ޒަމާނާއި އެއްގޮތަށް ތަރައްޤީކޮށްފައިވާ މާފަންނު ގަޑިބުރު، ރައީސުލްޖުމުހޫއްރީއްޔާ ޑރ. މުހައްމަދު މުއިއްޒު ރަސްމީކޮށް އިފްތިތާހް ކޮށްދެއްވައިފިއެވެ.
މި ގަޑިބުރު މިރޭ އިފްތިތާހް ކޮށްދިނުމުގެ ރަސްމީއްޔާތުގައި ރައީސްގެ ދެކަނބަލުންގެ އިތުރުން ނައިބް ރައީސް ހުސެއިން މުހައްމަދު ލަތީފް އާއި ސަރުކާރުގެ ވުޒާރާތަކުގެ އިސްވެރިންނާއި މާލެ ސިޓީ ކައުންސިލުގެ ކައުންސިލަރުން ވަނީ ބައިވެރިވެވަޑައިގެންފައެވެ. މިމަސައްކަތަކީ މާލެ ސިޓީ ކައުންސިލުގެ އިސްނެގުމަކަށް ޕައޮނިއަރ މޯލްޑިވްސްއިން ކޮށްދެއްވާފައިވާ މަސައްކަތެކެވެ. މި މަސައްކަތް ކޮށްފައިވަނީ އާރްސީސީ ކުންފުނީގެ ސީއެސްއާރުގެ ދަށުން ކަމަށް މާލެސިޓީ ކައުންސިލުން ހާމަ ކުރެއެވެ. މިއީ މިހާރުގެ ރައީސުލްޖުމުހޫއްރީއްޔާ އޭރުގެ މާލެ ސިޓީ މޭޔަރ ކަމުގެ މަޤާމުގައި ހުންނަވައި ފެއްޓެވި މަސައްކަތެކެވެ.
މާފަންނު ގަޑިބުރު އަލުން ތަރައްޤީކޮށް އިފްތިތާޙްކޮށް ދެއްވައިފި.މި ގަޑިބުރު ރަސްމީކޮށް އިފްތިތާޙްކޮށްދެއްވީ ދިވެހި ރާއްޖޭގެ ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު.
މިއީ ރައީސް ޑރ. މުޢިއްޒު @MMuizzu މާލެ ސިޓީގެ މޭޔަރު ކަމުގެ މަޤާމުގައި ފެއްޓެވި މަޝްރޫޢެއް!#ChaaluMaleCity pic.twitter.com/5I81SmxKLq— Malé City Council (@MaleCitymv) November 18, 2023
މިރަސްމީއްޔާތުގައި މިތަން އިފްތިތާހް ކޮށްދެއްވާ ރައީސް ދެއްކެވި ވާހަކަފުޅުގައި ވިދާޅުވީ، މިތަން ހެއްދެވުމަށް އެމަނިކުފާނު އިރުޝާދު ދެއްވީ ކުރީގައި އެތަނުގައި ހުރި ގަޑި ހުރިގޮތަށް ޒާމާނީ ގޮތެއް އެއަށް ގެނެސް، ޑިޖިޓަަލައިޒް ކުރުމުގެ ވިސްނުން އެއަށް ގެނެސްގެން، ގަޑި ބުރު ހަދައި ދިނުމަށް ކަމަށެވެ.
" މީގެ ބޭނުމަކީ ޒުވާނުންނަށްވެސް އަދި ޅަފުރައިގެ ކުޑަކުދިންނަށްވެސް ޖުމްލަކޮށް ހުރިހާ ފަރާތްތަކަށްވެސް މަޤުބޫލު ވިސްނުންތަކެއް މިއަށް ގެނައުން. އަދި ދެންމެ އިއުލާން ކުރެވުނު ގޮތަށް ފާހަގަ ކުރެވުނު ގޮތަށް، ބަންގި ގޮވާ އަޑު ފަސްވަގުތު {އިވޭ ގޮތަށް}. އެގޮތަށް ހަމަޖެހިފައި މިއޮތީ. " ރައީސް ވިދާޅުވިއެވެ.
ގަޑިބުރު އަލުން ބިނާކޮށްފައިވަނީ 5 ވަގުތު ބަންގި ގޮވާ ގޮތަށެވެ. އަދި ގަޑިއެއް އޭގެ އެންމެ މަތީގައި ކުރީގައިވެސް ހުރި ގޮތަށް ހުރިއިރު، މިހާރު ޒަމާނާއި އެއްގޮތަށް ލެޑް ބޯޑެއް ވަނީ ހަރުކުރެވިފައެވ.ެ މި ލެޑް ބޯޑަށް ކައުންސިލުން ބޭނުންވާ އެކި މެސެޖުތައް އެރުވޭނެ ކަމަށް މާލެ ސިޓީ ކައުންސިލުން ވަނީ ފާހަގަކޮށްފައެވެ.
މާފަންނު ގަޑިބުރަކީ 1990 ވަނަ އަހަރު ލަންކާ ސަރުކާރުގެ އެހީގައި ތަރައްޤީކޮށްފައިވާ ބިނާއެކެވެ. އޭގެ ފަހުން އެތަން ތަޅާލައި އެކި ބަދަލުތައް ބުރައް ގެނެސްފައިވެއެވެ.