އިލެކްޝަން ކޮމިޝަން (އީސީ) ގެ ރައީސްކަމުން ފުއާދު ތައުފީގު އިސްތިއުފާ ދެއްވަން ނިންމަވައިފި އެވެ.
އެނގިފައިވާ ގޮތުގައި އޭނަ އެ މަގާމު ދޫކޮށްލައްވަން ނިންމެވީ ޑރ. މުހައްމަދު މުއިއްޒުގެ ސަރުކާރުން ގައުމަކަށް ކަނޑައަޅުއްވާ ސަފީރެއްގެ މަގާމަށް ފުއާދު އައްޔަންކުތަން ނިންމާފައިވާތީ އެވެ.
ކުރިން ވެސް އީސީގެ ރައީސްކަން ކުރައްވާފައިވާ ފުއާދު އެ ކޮމިޝަންގެ ރައީސް ކަމަށް ފަހުން އައްޔަންކުރީ 2019 ގަ އެވެ. އަދި އީސީގެ ރައީސް ކަމަށް ފުއާދު ހަމަޖެއްސީ ސެޕްޓެމްބަރު 15، 2021 ގަ އެވެ.
ފުއާދަކީ 2008-2009 އަށް އީސީގެ މެންބަރުކަކަން ކުރެއްވި ބޭފުޅެކެވެ. އޭގެ ފަހުން 2014 ގެ މާޗް މަހާ ހަމައަށް ވެސް ފުއާދު އީސީގެ ރައީސްކަން ކުރެއްވި އެވެ. އޭނަ އެންމެ ފުރަތަމަ ސަރުކާރުގެ ވަޒީފާއާ ގުޅިވަޑައިގެންނެވީ ފެބުރުވަރީ 1973 ގަ އެވެ. ފުރަތަމަ ވަޒީފާ އަދާކުރެއްވީ ނެޝަނަލް ޕްލޭނިން މިނިސްޓްރީގަ އެވެ. އަދި 2007 ވަނަ އަހަރާ ހަމައަށް ހުންނެވީ އެ އިދާރާގެ އެސިސްޓެންޓް ޑިރެކްޓަ ޖެނެރަލްގެ މަގާމުގަ އެވެ.
ފުއާދު އީސީން އިސްތިއުފާ ދެއްވަން ނިންމެވި އިރު، އޭނަގެ މައްޗަށް އިތުބާރެއް ނެތް ކަމަށް އީސީގެ މެންބަރުން މި އަހަރުގެ ރިޔާސީ އިންތިހާބުގެ ކުރިން ވިދާޅުވެފައިވެ އެވެ.