ރައީސް ޑރ. މުހައްމަދު މުޢިއްޒުގެ ސަރުކާރުގެ ފުރަތަމަ 14 ހަފޔތާ ގުނާނީ ބަނދު ދުވަސްތައް ވެސް ލައިގެން ކަމަށް ރައީސް އޮފީހުން ހާމަކޮށްފިއެވެ.
ރައީސް އޮފީހުގެ މިނިސްޓަ ފޯ ސްޓްރެޓިޖިކް ކޮމިއުނިކޭޝަން އިބްރާޙިމް ހަލީލް "އައްޑޫ ލައިވް" އަށް ވިދާޅުވީ ކުރީ މި ސަރުކާރުން 100 ދުވަހެއް ނޫން ކަމަށާއި 14 ހަފުތާ ކަމަށެވެ. އަދި އެގޮތަށް ބަލާއިރު ބަންދު ދުވަސްތައް ހަފްތާ ތެރޭގައި ހިމެނޭނެ ކަމަށް ވިދާޅުވިއެވެ. އަދި ހުރިހާ މަސައްކަތެއްވެސް ކަނޑައެޅިފައިވާ މުއްދަތައް ނިންމަން މަސައްކަތް ކުރާނެ ކަމަށް ވިދާޅުވިއެވެ.
ހަލީލް ވިދާޅުވި ގޮތުގައި ރައީސް ބޭނުންފުޅުވަނީ، ސަރުކާރުގެ ކޮންމެ ދުވަހަކީވެސް ހަލުވި ދުވަހެއްގެ ގޮތުގައި ހެދުމަށް ކަމަށް ވިދާޅުވިއެވެ.
ރައީސް މުއިއްޒުގެ ސަރުކާރުގެ ފުރަތަމަ 100 ދުވަހުގެ ޕްލޭން "ހަފްތާ 14" ގެ ނަމުގައި ހުވާ ކުރުމުގެ ކުރިން ވަނީ ނެރެފައެވެ. އެ ޕްލޭންގައި 8 ދާއިރާއަކުން 161 ވަޢުދެއް ވަނީ ފުއްދުމަށް ވަނީ ހިމަނާފައެވެ. އަދި މި 14 ހަފްތާގެ ހުރިހާކަމަކަށް ޙަރަދުވާނެ ކަމަށް އަންދާޒާ ކޮށްފައިވަނީ 250 މިލިއަން ރުފިޔާއެވެ.
އެ ޕްލޭންގައި ހިމެނޭ ބައެއް މުހިންމު ކަންކަމުގެ ތެރޭގައި ފުރަތަމަ ދުވަހު އައު ވުޒާރާތައް އުފެއްދުމާއި، އިންޑިއާ ސިފައިން ބޭލުމަށް މަސައްކަތް ފެށުން ހިމެނެއެވެ. ސަރުކާރުން ވިދާޅުވަނީ ފުރަތަމަ ދުވަހުގެ ވަޢުދުތައް މިހާރު ފުއްދިފައިވާ ކަމަށާއި ބާކީ ހުރިހާ ވަޢުދުތައްވެސް ފުއްދުމަށް މަސައްކަތް ކުރާނެ ކަމަށެވެ.
މިގޮތުން ފުށިދިއްގަރުފަޅު ހިއްކަން ކުރިއަށް އޮތް 30 ދުވަހު ޢަމަލީ މަސައްކަތް ފައްޓަވާނެ ކަމަށް ރައީސް ވަނީ ރޭ ވިދާޅުވެފައެވެ. މީގެ އިތުރުން އައްޑޫ ބްރިޖާއި އަދި ބޭރުގެ ފަރާތްތަކާއި އެކު ވެފައިވާ އެއްބަސްވުންތައް ހާމަ ކުރާނެ ކަމަށް ވަނީ ހިމަނާފައެވެ. މީގެ އިތުރުން ދެކުނުން ގެއްލުނު ކަނޑު އަލުން ހޯދުމަށް އިޓްލޮސްއަށް އިސްތިއުނާފު ކުރާނެ ކަމަށް މި ޕްލޭންގައި ވަނީ ހިމަނާފައެވެ.