ރާއްޖޭގައި އިންޑިއާއަށް ނިސްބަތްވާ 77 އަށް ވުރެ ގިނަ ސިފައިން ތިބި ކަމަށް ސަރުކާރުން ހާމަކޮށްފިއެވެ.
ރައީސް އޮފީހުގެ ފަރާތުން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި މިކަން ހާމަކޮށް ރައީސް އޮފީހުގެ އަންޑަ ސެކްރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް އަބްދުﷲ ހަލީލް ވިދާޅުވީ، މިހާތަނަށް ބެލިބެލުމުން އިންޑިއާއަށް ނިސްބަތްވާ 77 ސިފައިން ރާއްޖޭގައި ޤާއިމްވެ ތިބި ކަމަށް މިހާރު އެނގިފައިވާ ކަމަށެވެ.
އެގޮތުން ސާފުވެފައިވާ މިންވަރަށް ބަލާއިރު ސިފައިން ތިބީ ދެ ހެލިކޮޕްޓަރާއި ޑޯނިއާ ބެލެހެއްޓުމަށް ކަމަށް ސަރުކާރުން ހާމަކުރެއެވެ. ފިރުޒުލް ހާމަކުރެއްވި އަދަދުތަކަށް ބަލާއިރު، އިންޑިއާއިން ހަދިޔާކުރި 1 ހެލިކޮޕްޓަރު ދުއްވުމުގެ މަސައްކަތުގައި 24 ސިފައިން، އަދި 2 ވަނަ ހެލިކޮޕްޓަރު ދުއްވުމުގެ މަސައްކަތުގައި 26 ސިފައިން އަދި ޑޯނިއާ މަތިންދާބޯޓު ދުއްވުމުގައި 24 އިންޑިއާ ސިފައިން ހަރަކާތްތެރިވާ ކަމަށެވެ. އަދި މެއިންޓަނަންސްއާއި އިންޖިއަރިންގެ މަސައްކަތުގައި 2 ސިފައިން މަސައްކަތް ކުރާކަމަށް ވިދާޅުވިއެވެ.
މިއަދަދުތަކަށް ބަލާއިރު މިއީ މަޖިލީހުގެ 241 ކޮމެޓީގައި އޭރުގެ ޑިފެންސް މިނިސްޓަރ މާރިޔާ އަހުމަދު ދީދީ އަދި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް ހާމަކުރެއްވި އަދަދުތަކަށް 2 އޮފިސަރުން އިތުރު އަދަދެކެވެ. ފިރުޒުލް ވިދާޅުވި ގޮތުގައި އެއަދަަދަކީ އޭރު މެއިޓެނެންސް އޮފިސަރުން ނުލައި ހާމަކޮށްފައިވާ އަދަދަކަށް ވެދާނެ ކަމަށެވެ.
އަދި އިންޑިއާ ސަރުކާރާއި އެކު މިހާރު މަސައްކަތް ފެށިފައިވާކަން ފާހަގަކޮށް ފިރުޒުލް ވިދާޅުވީ، މިހާރު ތިބި ސިފައިންނަކީ ހަތިޔާރާއި އެކު ތިބި ސިފައިންތޯ ނުވަތަ ނޫންތޯ މުހިންމު ނޫން ކަމަށެވެ. އަދި މި ސަރުކާރުގެ ސްޓޭންޑަކީ އެއްވެސް ސިފައިންނެއް ނުބޭތިއްބުން ކަމަށް ތަކުރާރު ކުރެއްވިއެވެ. ފިރުޒުލް މިހެން ވިދާޅުވެފައިވާއިރު ކެމްޕެއިން ތެރެއިން އޭރު އިދިކޮޅަށް ނިސްބަތްވާ ބައެއް ފަރާތްތަކުން ވަނީ ސިފައިން ތިބީ ހަތިޔާރާއި އެކު ކަމަށް ތުހުމަތުކޮށްފައެވެ.
މި ބައްދަލުވުމުގައި، ސަރުކާރުން ވަނީ ތަރައްޤީގެ މަޝްރޫޢުތަކުގެ އެއްބަސްވުން ފިޔައި ޙާރިޖީ ގޮތުން 100 އަށް ވުރެ ގިނަ އެއްބަސްވުން އިންޑިއާއެކު މިދިޔަ ސަރުކާރުގެ 5 އަހަރު ތެރޭ ސޮއިކޮށްފައިވާ ކަންވެސް ހާމަކޮށްފައެވެ. އެ އެއްބަސްވުންތަކުގެ ތަފްސީލް ހާމަ ކުރުމާއި ގުޅޭގޮތުން ފިރުޒުލް ވިދާޅުވީ، އެއްބަސްވުންތަކުން ހާމަ ކުރައްވާނީ ޤައުމީ ސިޔާދަތައް ފުށު އަރާ ކަންކަން ކަމަށެވެ.
މިގޮތަށް އެއްބަސްވުންތައް ހާމަކުރާއިރު، ދިފާޢީ ގޮތުން ހުރި ޓެކްނިކަލް ކަންކަން ފަދަ ޤައުމީ ސަލާމާތާއި ބެހޭ ކަންކަން ހިމެނޭ ކަންކަން އެއްބަސްވުންތަކުގެ ތަފްސީލުގެ ތެރެއިން ހާމަ ނުކުރައްވާނެކަން ވަނީ ފާހަގަކޮށްފައެވެ.
ރާއްޖޭގައި ތިބި އިންޑިއާ ސިފައިން ބޭރުކުރުމާއި، ބޭރު ޤައުމުތަކާއި އެކު ވެފައިވާ އެއްބަސްވުންތަކުގެ ތަފްސީލު ހާމަކުރުމަކީ ރާއީސް ޑރ. މުހައްމަދު މުޢިއްޒުގެ ރިޔާސީ ވަޢުދެކެވެ.