އިލެކްޝަން ކޮމިޝަން (އީސީ) ގެ ރައީސްކަމުގެ މަގާމުގައި ހުންނެވި ފުއާދު ތައުފީގު އެ ކޮމިޝަންގެ މެންބަރުކަން އިސްތިއުފާ ދެއްވަން ނިންމެވި ކަމަށް ބުނާ ވާހަކަ ދޮގުކޮށްފި އެވެ.
އެ ވާހަކަ މިއަދު ބައެއް މީޑިއާތަކުން ރިޕޯޓްކުރުމާ ގުޅިގެން އިސްތިއުފާ ދެއްވަން އުޅުއްވާ ވާހަކަ ދޮގުކުރައްވައި މީޑިއާއަކަށް ދެއްވި އިންޓަވިއުއެއްގައި ފުއާދު ވިދާޅުވީ އިސްތިއުފާ ދެއްވަން ނޫޅުއްވާ ކަމަށާއި އެއީ ކީއްވެގެން ފެތުރުނު ވާހަކަތަކެއް ކަމެއް އެނގިވަޑައިނުގަންނަވާ ކަމަށެވެ.
ބައެއް މީޑިއާތަކުން ބުނި ގޮތުގައި ފުއާދު އީސީން އިސްތިއުފާ ދެއްވަން ނިންމެވީ ގައުމަކަށް ކަނޑައަޅާ ސަފީރެއްގެ މަގާމު، އާ ސަރުކާރުން ދެއްވަން ހަމަޖެހިފައިވާތީ އެވެ. ނަމަވެސް އޭނަ ވިދާޅުވީ ސަރުކާރުން އެއްވެސް މަގާމެއް ހުށަހަޅާފައި ނެތް ކަމަށާއި އެފަދަ މައުލޫމާތެއް ލިބިވަޑައިގެންފައި ވެސް ނެތް ކަމަށެވެ.
ކުރިން ވެސް އީސީގެ ރައީސްކަން ކުރެއްވި ފުއާދު އެންމެ ފަހުން އީސީގެ މެންބަރު ކަމަށް އައްޔަންކުރީ 2019 ގަ އެވެ. ނަމަވެސް މި އަހަރުގެ ސެޕްޓެމްބަރުގައި ރިޔާސީ އިންތިހާބު ބޭއްވުމުގެ ކުރިން، ފުއާދު ދެއްކެވި ބައެއް ވާހަކަތަކަކާ ގުޅިގެން އޭނަގެ މައްޗަށް އީސީގެ މެންބަރުންގެ އިތުބާރެއް ނެތް ކަމަށް މެންބަރުން ވިދާޅުވެފައިވެ އެވެ.