އިންޑިއާގެ އެފްކޮންސްއާ ހަވާލުކޮށްގެން ކުރީގެ ސަރުކާރުން ފެށި ތިލަމާލެ ބްރިޖްގެ މަސައްކަތް ވަރަށް ލަސްކަމާއި އެ މަސައްކަތުގެ ތެރެއިން މިހާތަނަށް ނިމުނީ އެންމެ 27 ޕަސެންޓް މަސައްކަތް ކަމަށް އާ ސަރުކާރުން ބުނެފި އެވެ.
ރައީސް އޮފީހުގައި އިއްޔެ ބޭއްވި ނޫސްވެރިން ކޮންފަރެންސްގައި އެ އޮފީހުގެ އަންޑަ ސެކްރެޓަރީ އެރެޓަރީ، ޕަބްލިކް ޕޮލިސީ މުހައްމަދު ފިރުޒުލް ވިދާޅުވީ ތާވަލަށް ބަލާ އިރު މިއަދާ ހަމައަށް ބްރިޖު މަސައްކަތުގެ 77 ޕަސެންޓް އޮންނަން ޖެހޭނީ ނިމިފައި ކަމަށެވެ.
"އެހެން ނަމަވެސް، މިހާތަނަށް ނިމިފައި ވަނީ ހަތާވީސް ޕަސެންޓް މަސައްކަތް." އޭނާ ވިދާޅުވި އެވެ.
ފިރުޒުލް ވިދާޅުވީ ބްރިޖުގެ މަސައްކަތުގެ ހާލަތު ދެނެގަނެ، މަސައްކަތް ލަސްވީ ކީއްވެތޯ ބަލައި މަޝްރޫއު ނިމޭނެ ތާރީހެއް ސަރުކާރުން ސާފުކުރަން ބޭނުންވާ ކަމަށެވެ.
"ކޮން ކަމެއް ދިމާވެގެން، ކޮން ކަންތައްތަކެއް ދިމާވެގެންތޯ މި ހުރި ޗެލެންޖުތައް މި ހުރީ ނުވަތަ މިހާ ބޮޑު ގެޕެއް، ލަސްވުމެއް މި މަސައްކަތުގައި އުޅެނީ." އޭނަ ވިދާޅުވި އެވެ.
ތިލަމާލެ ބްރިޖްގެ މަސައްކަތް ލަސްވާން ދިމާވި ސަބަބުތައް ދެނެގަތުމަކީ ރައީސް ޑރ. މުހައްމަދު މުއިއްޒު ސަރުކާރުގެ ފުރަތަމަ 14 ހަފުތާގެ ތެރޭގައި ކުރަން ނިންމާފައިވާ ކަންކަމުގެ ތެރޭގައި ހިމެނޭ ކަމެކެވެ. ފިރުޒުލް ވިދާޅުވި ގޮތުގައި ތިލަމާލެ މަޝްރޫއު ރީޝެޑިއުލް ކުރުމަށް މަސައްކަތް ފެށޭނީ ވެސް ލަސްވާން ދިމާވި ސަބަބުތައް ދެނެގަނެވިގެން ކަމަށެވެ.
ރައީސް އިބްރާހީމް މުހައްމަދު ސޯލިހުގެ ސަރުކާރުން ތާވަލުކޮށްފައި އޮތް ގޮތުން މާލެ-ވިލިމާލެ ބްރިޖު ނިންމަން އޮތީ އެންމެ ލަސްވެގެން މި އަހަރުގެ އޮގަސްޓަށެވެ. އަދި ވިލިމާލެ-ގުޅިފަޅު ގުޅާލުމުގެ މަސައްކަތް އަންނަ މަހަށް ނިންމުމަށެވެ. މީގެ އިތުރުން
ތިލަފުށި-ގުޅިފަޅު ގުޅާލައި މުޅި ބްރިޖު އެއްކޮށް ނިންމަން އޮތީ އަންނަ އަހަރުގެ ނޮވެމްބަރަށެވެ.
ތިލަމާލެ ބްރިޖަކީ 500 މިލިއަން ޑޮލަރު (6.2 ބިލިއަން ރުފިޔާ) ގެ މަޝްރޫއެކެވެ. މީގެ ތެރެއިން 100 މިލިއަން ޑޮލަރު (1.55 ބިލިއަން ރުފިޔާ) އަކީ އިންޑިއާގެ ހިލޭ އެހީ އެވެ.
ރައީސް ސޯލިހުގެ ސަރުކާރުން އަޅަން ނިންމި ބްރިޖް ނުނިމި ދައުރު ނިންމައިލަން ޖެހުނު އިރު، މުއިއްޒުގެ ސަރުކާރުން އޮތީ އައްޑޫގައި ބްރިޖް މަޝްރޫއެއް ކުރިއަށް ގެންދަން ނިންމައިފަ އެވެ. އެއީ އައްޑޫގައި ވަކިން އޮންނަ ހުޅުމީދު އާއި ހިތަދޫ ގުޅައިލަން އަޅާ ބްރިޖެވެ. އާ ސަރުކާރުގެ ފުރަތަމަ 100 ދުވަހުގެ ތެރޭގައި ކުރަން ޕްލޭންކޮށްފައިވާ ކަންކަމުގެ ތެރޭގައި މި ބްރިޖާ ގުޅުން ހުރި މަސައްކަތްތައް ވެސް ހިމެނެ އެވެ.
މާލެ އާއި ހުޅުމާލެއާ ދެމެދު އޮތް "ސިނަމާލެ ބްރިޖް" އަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި އެޅި ބްރިޖެކެވެ. އެ އެއީ ޗައިނާގެ އެހީގައި ހިންގި މަޝްރޫއެކެވެ.