ކުޑަކުދިމްގެ ހާއްސަ ޑޮކްޓަރުން ފަރުވާދޭނީ އުމުރުން 16 އަހަރުން ދަށުގެ އުމުރުފުރާގެ ކުދިންނަށް ކަމަށް ކަނޑައަޅައިފި އެވެ.
މިކަމާ ގުޅޭ ގޮތުން އާ ސަރުކާރުގެ ހެލްތު މިނިސްޓްރީން މިއަދު ބުނީ ސިއްހީ ހިދުމަތް ދޭ ތަންތަނުގައި ހިދުމަތް ދިނުމުގައި ގެންގުޅޭ އުސޫލްތައް އެއްގޮތް ކުރެވިފައި އޮތުމަކީ މުހިއްމު ކަމެއް ކަމަށެވެ. އެހެންވެ އާންމު އުސޫލެއްގެ ގޮތުން ކުޑަކުދިންގެ ހާއްސަ ޑޮކްޓަރުން ބެއްލެވުމާއި، ފަރުވާ ދެއްވުމަށް ވަކި އުމުރުފުރާއެއް މިނިސްޓްރީން ކަނޑައަޅެޅީ ކަމަށް ބުންޏެވެ.
އެގޮތުން ކުޑަކުދިންގެ ހާއްސަ ޑޮކްޓަރުން ފަރުވާ ދެއްވާނީ 16 އަހަރުން ދަށުގެ ކުދިން ކަމަށް ވަނ ކަނޑައަޅައިފަ އެވެ.
މި ގޮތަށް ކަނޑައެޅި ނަމަވެސް ކުޑަކުދިންގެ ހާއްސަ ޑޮކްޓަރުން، އެ ޑޮކްޓަރެއްގެ ކޮންޕިޓެންސީ، ސްކޯޕް އޮފް ޕްރެކްޓިސް އަދި ކޯޑް އޮފް ކޮންޑަކްޓާ ހިލާފު ނުވާ ގޮތުގެ މަތިން 16 އަހަރުން މަތީ އުމުރުފުރާގެ ކުދިން/މީހުން ބެލުމަށާއި، ފަރުވާ ދިނުމަށް ހުރަހެއް ނެތް ކަމަށް ހެލްތު މިނިސްޓްރީން ބުންޏެވެ.
މިނިސްޓްރީން ބުނީ މި އުސޫލަށް އިތުރު ބަދަލެއް ނުގެނެވޭހާ ހިނދަކު، ރާއްޖޭގެ ހުރިހާ ހޮސްޕިޓަލްކުން ވެސް ސިއްހީ ހިދުމަތް ދިނުމުގައި އުސޫލަށް އަމަލުކުރަން އަންގާ ކަމަށެވެ.