ގ.ދ ތިނަދޫގައި ޤާއިމްކޮށްފައިވާ އިސްލާމީ މަރުކަޒު އިސްލާމިކް ޔުނިވާސިޓީ އޮފް މޯލްޑިވްސްގެ ކޯސްތައް ހިންގަން ހަވާލުކޮށްފިއެވެ.
މިއަދު މިކަމާއި ގުޅޭގޮތުން 10 އަހަރު ދުވަހުގެ އެއްބަސްވުމެއްގައި އިސްލާމީ ކަންތައްތަކާއި ބެހޭ ވުޒާރާއާއި އިސްލާމިކް ޔުނިވާސިޓީ އޮފް މޯލްޑިވްސް އާއި ދެމެދު ވަނީ ސޮއިކުރެވިފައެވެ. މި އެއްބަސްވުމުގައި އިސްލާމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރ ޑރ. ޝަހީމް ޢަލީ ސަޢީދުއެވެ. އިސްލާމިކް ޔުނިވާސިޓީގެ ފަރާތުން އެއްބަސްވުމުގައި ސޮއިކުރެއްވީ އެ ޔުނިވާސިޓީގެ ވައިސް ޗާންސެލަރ ޑރ. އަލީ ޒާހިރުއެވެ.
އެއްބަސްވުމުގައި ސޮއިކުރެއްވުމަށް ފަހު އިސްލާމިކް މިނިސްޓަރ ޑރ. ޝަހީމް ޢަލީ ސަޢީދު ދެއްކެވި ވާހަކަފުޅުގައި، ވިދާޅުވީ މިއީ ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ރާއްޖޭގެ ކަންކޮޅުތަކުގައި އިސްލާމިކް ޔުނިވާސިޓީގެ ކޯސްތައް ފެށުމަށް ކުރަމުންދާ މަސައްކަތުގެ ތެރެއިން އެޅުނު ފިޔަވަޅެއް ކަމަށެވެ. އަދި އައިޔޫއެމްގެ ތަރައްޤީއަށް މަސައްކަތް ކޮށްދިނުމަށް ތައްޔާރަށް ތިބިކަމަށް ޑރ. ޝަހީމް ވިދާޅުވިއެވެ.
"އިސްލާމިކް ޔުނިވާސިޓީ މިދަނީ ވަރަށް ބޮޑަށް ފުޅާވަމުން. ކުރިއަށް އޮތް ދެ އަހަރު ދުވަހުގެ ތެރޭގައި އިސްލާމިކް ޔުނިވާސިޓީގެ ބިނާތައް ރާއްޖެއަށް އަންނާނެ. އިސްލާމިކް ޔުނިވާސިޓީ ކޯސްތައް ފެށެން މަގުތަނަވަސް ވެެގެން ދާނެ. " ޑރ. ޝަހީމް ވިދާޅުވިއެވެ.
ރާއްޖޭގެ ދެކުނުގައި އިސްލާމިކް ޔުނިވަރސިޓީ އޮފް މޯލްޑިވްސް (އައި.ޔޫ.އެމް)ގެ ކެމްޕަސް ހިންގުމަށް ގދ. ތިނަދޫގައި ހުރި އިސްލާމީ މަރުކަޒު ޙަވާލުކޮށްފި. pic.twitter.com/otPKFSmMwX
— Ministry of Islamic Affairs (@MVIaffairs) November 21, 2023
މި ބައްދަލުވުމުގައި ވާހަކަ ދައްކަވަމުން އިސްލާމިކް ޔުނިވާސިޓީއަށް މީގެ ދެދުވަސް ކުރިން އައްޔަން ކުރެވުނު ވައިސް ޗާންސެލަރ ޑރ. އަލީ ޒާހިރު ވިދާޅުވި މިހާރުވެސް ތިނަދޫގައި ކޯސްތައް ހިންގަމުންދާ ކަމަށެވެ. ނަމަވެސް އަމިއްލަ ތަނެއް ނެތުމުގެ ވަރަށް ބޮޑު ދަތިތަކެއް ދިމާވާ ކަމަށާއި، މިހާރު މިތަން ލިބުމުން މިއީ ލިބިގެންދާ ވަރަށް ބޮޑު ލުއިފަސާހެއަށް ކަމަށެވެ.
ތިނަދޫ އިސްލާމީ މަރުކަޒުން އައިޔޫއެމްއަށް އޮފީސް ހިންގުމަށާއި ކްލާސްތައް ހިންގުމަށް ބޭނުންވާ ވަސީލަތްތައް ލިބިގެންދާނެއެވެ. އިސްލާމިކް މިނިސްޓްރީން ވިދާޅުވީ ތިނަދޫ އަކީ މި ސަރަހައްދުގެ މަރުކަޒީ ރަށަކަށްވުމުން ކައިރިރި ރައްތަކުންވެސް ކިޔަވަން ދަރިވަރުން އަންނާނެ ކަމަށެވެ. އެހެން ކަމުން މިއީ ޔުނިވާސިިޓީ ފުޅާ ކުރުމަށް ލިބޭ ފަހި ފުރުސަތެއް ކަމަށެވެ.