ވެރިކަމާ ހަވާލުވެވަޑައިގަތް ފަހުން ރާއްޖެ އިން ބޭރަށް ކުރައްވާ ފުރަތަމަ ދަތުރުގައި ރައީސް ޑރ. މުހައްމަދު މުއިއްޒު މާދަމާ ސައުދީ އަރަބިއްޔާ އަށް ވަޑައިގަންނަވާ ގޮތަށް ހަމަޖެހިއްޖެ އެވެ.
މިކަން ސައުދީގެ މީޑިއާތަކުން ރިޕޯޓްކުރި ނަމަވެސް، ސަރުކާރުން މިކަމާ ބެހޭ ގޮތުން ވަކި އެއްޗެއް އަދި ހާމައެެއް ނުކުރެ އެވެ. ނަމަވެސް ފާހަގަކޮށްލެވޭ ކަމަކީ ރައީސްކަމާ ހަވާލުވެވަޑައިގަތުމަށް ފަހު، މުއިއްޒު ފުރަތަމަ ވައިގަންނަވާނެ ސައުދީ ކަމަށް ބުނެ ކުރިން ވެސް ވާހަކަ ދެކެވިފައިވާކަމެވެ.
ސައުދީން ރިޕޯޓްކޮށްފައިވާ ރައީސް މުއިއްޒުގެ ދަތުރަކީ ތިން ދުވަހުގެ ދަތުރެކެވެ.
ރައީސް ސައުދީ އަށް ވަޑައިގަންނަވާ އިރު، ދެ ގައުމުން ވިޔަފާރީގެ އެއްބަސްވުމެއްގައި ސޮއިކުރަން ނިންމާފައިވެ އެވެ. އެގޮތަށް ނިންމީ ސައުދީ ރަސްގެފާނު ސަލްމާން ބިން އަބްދުލް އަޒީޒް ރިޔާސަތު ބެލެހެއްޓެވި ބައްދަލުވުމެއްގަ އެވެ.
އެ ބައްދަލުވުމުގައި ނިންމާފައި ވަނީ ރާއްޖޭގެ އިކޮނޮމިކް ޑިވެލޮޕްމަންޓް މިނިސްޓްރީއާ މަޝްވަރާކޮށްގެން ވިޔަފާރިއާ ގުޅޭޭ ދާއިރާގެ އެެއްބަސްވުމެއްގައި ސައުދީގެ އިކޮނޮމިކް މިނިސްޓަރު އަދި ފޮރިން އިންވެސްޓްމަންޓް އޮތޯރިޓީގެ ޗެއާމަންއާ ހަވާލުކުރުމަށެވެ.