ޕްރޮގްރެސިވް ޕާޓީ އޮފް މޯލްޑިވްސްގެ ސެނެޓުން އަދި ޕާޓީގެ ހަރަކާތްތަކުން ކުރީގެ މިނިސްޓަރ މުހައްމަދު މަލީޙް ޖަމާލް ސަސްޕެންޑް ކޮށްފައިވާ ކަމަށް އެ ޕާޓީން އަންގައިފިއެވެ.
މިކަން އަންގައި ޕީޕީއެމްގެ 2 ނައިބް ރައީސުން ކަމަށްވާ ޑިފެންސް މިނިސްޓަރ ޢައްސާން މައުމޫން އަދި މިހާރުގެ ފިޝަރީޒް މިނިސްޓަރ އަހުމަދު ޝިޔާމް ސޮއިކުރައްވާ މަލީހަށް ފޮނުވާފައިވާ ސިޓީގައި އޭނާ ޢަމަލުތަކުން ޕާޓީ ބައިބައިކުރުމަށް މަސައްކަތް ކޮށްފައިވާ ކަމަށް ތުހުމަތުކޮށްފައެވެ. އެގޮތުން ސެނެޓަރެއްގެ މަޤާމުގައި ހުންނަވާ މަލީހުގެ ޕާޓީ ބައިބައި ކުރަން މަސައްކަތް ކުރާ ކަމަށް ޕާޓީގެ ލީޑާޝިޕަށް ފާހަގަވެފައިވާ ކަމަށް ސިޓީގައި ވެއެވެ.
މަލީހަށް ފޮނުވި ސިޓީގައި ވިދާޅުވީ، ޕާޓީގެ ލީޑަރޝިޕަށް އަދި ސެނެޓަށް އެންގުމަކާއި ނުލައި، އަމިއްލަފުޅު ކޮމެޓީތައް އުފައްދަވައި ޕާޓީގެ އަސާސީ ޤަވާއިދާއި ޚިލާފަށް ޕާޓީގެ އެއްވެސް މަޝްވަރާއެއް ނެތި ޕްރެސް ކޮންފަރެންސް ބާއްވާފައިވާ ކަމަށެވެ. އަދި އެ ޕްރެސް ކޮންފަރެންސް ލީޑު ކުރައްވައި ޕާޓީ ބަދުނާމު ކޮށްފައިވާ ކަމަށް ވަނީ ވިދާޅުވެފައެވެ.
މިކަންކަން ފާހަގަ ވުމުން ޕާޓީގެ އަސާސީ ޤަވާއިދުގެ 8 ވަނަ މާއްދާއިން ޕާޓީ ލީޑާޝިޕަށް ލިބޭ ބާރުގެ ދަށުން، މަލީހު ޕާޓީގެ ހުރިހާ ހަރަކާތަކުން ސަސްޕެންޑްކޮށް، ޕާޓީގެ ސުލޫކީ ކޮމެޓީއަށް މައްސަލަ ފޮނުވާފައިވާ ކަމަށް ވަނީ ވިދާޅުވެފައެވެ. އަދި މިހާރުން ފެށިގެން ސުލޫކީ ކޮމެޓީން ގޮތެއް ނިންމަންދެން ޕާޓީގެ އެއްވެސް ހަރަކާތެއްގައި ބައިވެރި ނުވެވޭނެ ކަމަށް ވަނީ އަންގާފައެވެ.
ރައީސް ޔާމީނުގެ ނަމުގައި ޕާޓީގެ ތެރެއިން ލީޑާޝިޕުގައި ހިމެނިވަޑައި ނުގަންނަވާ ބޭފުޅުން ރޭ ވަނީ ޕްރެސް ކޮންފަރެންސެއް ބާއްވާފައެވެ. މި ޕްރެސްގެ ތެރެއިން ޕާޓީގެ މިހާރުގެ ސެކެރެޓަރީ ޖެނެރަލް މުހައްމަދު ތޮލާލް މަސްޢޫލީއްޔަތު އަދާ ކުރެއްވުމަށް އުޒުރުވެރިވެފައިވާ ކަމަށް ވަނީ ބުނެފައެވެ. އަދި ޕާޓީގެ ސްޕޯކްސް ޕާސަން، ހީނާ އިސްތިއުފާ ދިން ކަމަށްވެސް ބުނެފައިވެއެވެ. ނަމަވެސް އެ ދެ ބޭފުޅުން މިކަން ދޮގުކުރައްވައެވެ.
މިމައްސަލަ ހޫނުވެ ޕާޓީގެ ސެނެޓު ގްރޫޕުން ރޭ މަލީހު ވަނީ ބޭރުވެސް ކޮށްލާފައެވެ.