މިހާރު ކުރަމުންދާ މަސައްކަތުގައި އެންމެ އިންޗިއެއްވެސް ފަހަތަށް ނުޖެހޭނެ ކަމަށް ކުރީގެ މިނިސްޓަރ މުހައްމަދު މަލީހު ޖަމާލް ވިދާޅުވެއްޖެއެވެ.
އޭނާ މިހެން ވިދާޅުވެފައި މިވަނީ، ބެލެވޭ ގޮތުން ޕީޕީއެމްއިން އޭނާ ސަސްޕެންޑް ކުރުމާއި ގުޅިގެންނެވެ. އޭނާ އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް ޔާމީނާއި ޕީޕީއެމްގެ ދިފާޢުގައި އެންމެ އިންޗިއެއްވެސް ފަހަތަށް ޖެހި ވަޑައި ނުގަންނަވާނެ ކަމަށެވެ.
"ވަޒީފާގެ އަޅުންނަށްވެ ޕާޓީގެ މަސްލަހަތު ނަގާލައި، ވަޒީފާގެ ބިރަށް ސިޓީގައި ސޮއިކުރާ ފިނޑިން ކުރިމަތީ ބޯ ތިިރި ނުކުރާނަން. މިއީ އަދި ވަކަރަށް ޖަލާލުމެއް" މަލީހު ވިދާޅުވިއެވެ.
ޕީޕީއެމްއިން މަލީހު ސަސްޕެންޑު ކޮށްފައިވަނީ މަލީހު އިސްވެ ކުރީގެ ނައިބް ރައީސް އަބްދުﷲ ޖިހާދު ހިމެނިވަޑައިގަންނަވާހެން، ޕީޕީއެމްގެ ނަމުގައި ޕްރެސް ކޮންފަރެންސެއް ބާއްވައި ޕާޓީ ބަދުނާމުކޮށް ބައިބަކުރަން މަސައްކަތް ކުރަމުންދާ ކަމަށް ތުހުމަތު ކޮށެވެ. އެގޮތުން މާލީހު ޕާޓީގެ ހުރިހާ ހަރަކާތަކުން ސަސްޕެންޑް ކޮށް އޭނާގެ މައްސަލަ ވަނީ ސުލޫކީ ކޮމެޓީއަށް ފޮނުވާފައި ކަމަށް އޭނާ ސަސްޕެންޑް ކުރި ސިޓީގައި ވެއެވެ.
މަލީހު ހިމެނޭހެން 13 ބޭފުޅުންގެ ކޮމެޓީއެއް އެކުލަވާލާފައިވާއިރު ކޮމެޓީ ތަމްސީލު ކުރައްވަނީ ރައީސް ޔާމީނު ކަމަށް އެ ބޭފުޅުން ދަނީ ބުނަމުުންނެވެ. އަދި ރައީސް ޔާމީން އެދިވަޑައިގަންނަވަނީ ޕާޓީގެ ލީޑާޝިޕާއި ދުރުން މި ބޭފުޅުންނަށް ގުޅުއްވައި ހަރަކާތްތައް ކުރިއަށް ގެންދިއުމަށް ކަމަށް މަލީހު ވިދާޅުވެއެވެ.
މިވަގުތު ގޭ މާލޭ ބަނދުގައި ހުންނެވި ނަމަވެސް ރައީސް ޔާމީނަށް ސިޔާސީ ހަރަކާތް ނުހިންގެވޭނެ ކަމަށް ޕޭރޯލް ޤާނޫނުގައިވެއެވެ. އެމަނިކުފާނު ބަނދުގައި ހުންނަވާ ޕީޕީއެމް އޮފީހަށް ވަޑައިގެން ސަޕޯޓަރުންނާއި ބައްދަލު ކުރެއްވިއެވެ. އެ މައްސަލާގައި ކަރެކްޝަނުން ވަނީ ޔާމީނަށް އިންޒާރުވެސް ދެއްވާފައެވެ.