މާލެ އަށް ދިމާވެފައި ހުރި މައްސަލަތައް ހައްލުކުރަން ބޭނުން ވަނީ ޑިމޮކްރެޓުންގެ ސިޔާސަތު ކަމަށް އެ ޕާޓީގެ ރައީސް ވާދަކުރައްވާ ހަސަން ލަތީފު ވިދާޅުވެއްޖެ އެވެ.
ރާއްޖޭގައި އެންމެ ފަހުން ވުޖޫދަށް އައި ޕާޓީ، ދަ ޑިމޮކްރެކްޓްސް އުފެއްދުމުގައި އެންމެ އިސްކޮށް އުޅުއްވި މެންބަރުންގެ ތެރޭގައި ހިމެނޭ ހަސަން ލަތީފު އެގޮތަށް ވިދާޅުވީ ޖެނުއަރީ މަހު ބާއްވަން ހަމަޖެހިފައިވާ މާލޭގެ މޭޔަރު އިންތިހާބުުރަން ބާއްވާ ބައި-އިލެކްޝަނަށް ޑިމޮކްރެޓްސްގެ ފަރާތުން ވާދަކުރައްވާ ކެންޑިޑޭޓް ސައިފު ފާތިހުއާ ގުޅޭ ގޮތުން އާންމުކުރެއްވި ސޯޝަލް މީޑިއާ ޕޯސްޓެއްގަ އެވެ.
ސައިފަކީ މާލެ ސިޓީ ކައުންސިލްގެ މެންބަރެއް ވެސް މެ އެވެ.
"މާލެ އަށް ހައްލު ހޯދެން އަންނަނީ ޑިމޮކްރެޓްސްގެ ސިޔާސަތުތަކުން. ޑިމޮކްރެޓުންގެ ކެންޑިޑޭޓް އަކީ މާލޭގެ ރައްޔިތުންނަށް ލިބިފައިވާ ޖަވާހިރެއް." ހަސަން ވިދާޅުވި އެވެ.
މާލެއަށް ހައްލުހޯދެން އަންނަނީ @TheDemocratsMV ގެ ސިޔާސަތުތަކުން. ޑިމޮކްރެޓުންގެ ކެނޑިޑޭޓު @aekofathih އަކީ މާލޭގެ ރައްޔިތުންނަށް ލިބިފައިވާ ޖަވާހިރެއް. ސައިފަކީ ޒަމާނީ ޓެކްނޮލޮޖީގެ ތެރެއިން ހަލުވިކަމާއެކު މާލޭގެ މައްސަލަތައް ހައްލުކުރުމުގެ ދުރުވިސްނުންހުރި ހަމައެކަނި ކެނޑިޑޭަޓް pic.twitter.com/vFEgiOO8IA
— Hassan Latheef🎈 (@HassanLatheef) November 22, 2023
އޭނަ ވިދާޅުވީ ސައިފަކީ ޒަމާނީ ޓެކްނޮލޮޖީގެ ތެރެއިން ހަލުވިކަމާ އެކީ މާލޭގެ މައްސަލަތައް ހައްލުކުރުމުގެ ދުރުވިސްނުން ހުރި ހަމައެކަނި ކެންޑިޑޭޓް ވެސް ކަމަށެވެ.
މާލޭގެ މޭޔަރު ކަމަށް ވާދަކުރައްވަން ނިންމަވާފައިވާ ބޭފުޅުންގެ ތެރޭގައި ކުރީގެ އެޓާނީ ޖެނެރަލް އާޒިމާ ޝަކޫރާއި ކުރީގެ ޕޮލިސް ކޮމިޝަނަރު ހުސައިން ވަހީދުގެ އިތުރުން ރައީސް އިބްރާހީމް މުހައްމަދު ސޯލިހުގެ ސަރުކާރުގެ ޔޫތު މިނިސްޓަރު އަހުމަދު މަހުލޫފް ހިމެނިވަޑައިގަނެ އެވެ.
މާލޭގެ މޭޔަރުގެ މަގާމު ހުސްވީ މިދިޔަ ހުކުރު ދުވަހު ރައީސްކަމުގެ ހުވާކުރެއްވި ޑރ. މުހައްމަދު މުއިއްޒު ސެޕްޓެމްބަރުގައި ރިޔާސީ އިންތިހާބު ކާމިޔާބު ކުރެއްވުމާ ގުޅިގެންނެވެ.
މޭޔަރު ހޮވަން ބާއްވާ ބައި-އިލެކްޝަން އޮންނާނެ ތާރީހެއް އިލެކްޝަން ކޮމިޝަން (އީސީ) އިން އަދި އިއުލާނެއް ނުކުރެ އެވެ.