ދިވެހި ރާއްޖޭގެ ޤާނޫނު އަސާސީގެ ދަށުން ރައިސުލްޖުމުހޫއްރީއްޔާއަށް ލިބިދީފައިވާ ބާރުގެ ދަށުން، ބަންޑާރަ ނައިބުގެ އޮފީހުގެ ބެލުމުގެ ދަށުން އުފައްދަވާފައިވާ މަދަނީ ހައްޤުތަކާއި ބެހޭ އޮފީހަށް ޝަކުވާ ހުށަހެޅުމުގެ ނިޒާމު ބަންޑާރަ ނައިބު އޮފީހުން ޤާއިމްކޮށްފިއެވެ.
ބަންޑާރަ ނައިބުގެ އޮފީހުން މިކަމާއި ގުޅިގެން ނެރުނު ނޫސްބަޔާނުގައި ބުނެފައިވަނީ، ރައީސް ޑރ. މުހައްމަދު މުއިއްޒުއަށް ލިބިގެންވާ ބާރުގެ ދަށުން 17 ނޮވެމްބަރުގައި މަދަނީ ހައްޤުތައް ކަށަވަރު ކުރުމާއި ބެހޭ އޮފީސް ނުވަތަ "އޮފީސް ފޯ ސިވިލް ރައިޓްސް" ޤާއިމްކޮށްފައިވާ ކަމަށެވެ. ބަނޑާރަ ނައިބުގެ އޮފީހުގެ ބެލުމުގެ ދަށުން ޤާއިމް ކުރެވިފައިވާ މި އޮފީހަށް ޝަކުވާ ހުށެހޭޅެނެ ރަސްމީ ނިޒާމު މިއަދު ޤާއިމްކޮށްފައިވާ ކަމަށް އެއޮފީހުން ބުނެއެވެ.
މިއޮފީހަށް ކަނޑައަޅާފައިވާ މަސައްކަތުގެ ތެރޭގައި، ދިވެހިރާއްޖޭގެ ޖުމުހޫރިއްޔާގެ ޤާނޫނު އަސާސީއާއި ޤާނޫނުތަކުގެ ދަށުން، ކޮންމެ މީހަކަށް ލިބިދީފައިވާ އެންމެހައި މަދަނީ ހައްޤުތައް ލިބިދޭކަން ކަށަވަރުކުރުމާއި ގުޅޭ މަސައްކަތް ކުރުން ހިމެނެއެވެ. މި އާއެކު، މަދަނީ ހައްޤުތައް ލިބިދިނުމުގައި ކުރެވޭ އެކިއެކި ތަފާތުކުރުންތަކާއި ގުޅޭ ޝަކުވާތަކާއި، މަދަނީ ހައްޤުތައް ލިބިނުދީ ހިފެހެއްޓުމާއި ގުޅޭގޮތުން މީހުން ކުރާ ޝަކުވާތައް، ހުށެހެޅުމުން ޝަކުވާ ބަލައި ފިޔަވަޅު އެޅުން ހިމެނެއެވެ.
ބަންޑާރަ ނައިބު އޮފީހުން ބުނެފައިވަނީ މި ޝަކުވާތައް ބެލުމުގައި ޢަމަލުކުރާނީ އެ އޮފީހުން ކަނޑައަޅާފައިވާ "އޮފީސް ފޯ ސިވިލް ރައިޓްސްއަށް ޝަކުވާ ހުށަހެޅުމާއި ގުޅޭ ގައިޑްލައިން" އަށް ކަމަށެވެ. އަދި މި ގައިޑްލައިނާއި ޝަކުވާ ހުށެހެޅުމާއި ބެހޭ ފޯމު އަދި ނިޒާމާއި ބެހޭ އިތުރު މައުލޫމާތު ބަންޑާރަ ނައިބުގެ އޮފީހުގެ ވެބްސައިޓުން ލިބޭނެ ކަމަށް ވަނީ ހާމަކޮށްފައެވެ.
މަދަނީ ހައްޤުތަކާއި ބެހޭ އޮފީސް ބަންޑާރަ ނައިބުގެ އޮފީހުގެ ބެލުމުގެ ދަށުން ޤާއިމް ކުރުމަކީ ރައީސްގެ ފުރަތަމަ 100 ދުވަހުގެ ވަޢުދުތަކުގެ ތެރޭގައި ހިމެނޭ ކަމެކެވެ. މިކަން ކުރުމަށް 14 ހަފްތާ އޮތް ނަމަވެސް މި އޮފީހަށް ޤާއިމްކޮށް ޝަކުވާ ހުށަހެޅުމާއި ބެހޭ ނިޒާމު މިވަނީ ފުރަތަމަ ހަފްތާ ތެރޭގައި ޤާއިމްކޮށްފައެވެ.