މާދަމާ 50 އަހަރު ފުރޭ އިރު އަދިވެސް އިހުސާސް ކުރެވެނީ ޓީނޭޖްގައި އުޅެވޭ ކަމަށާއި އަދި 22 އަހަރު ވެސް ނުވާ ކަމަށް ބޮލީވުޑްގެ މަޝްހޫރު އެކްޓަރު އާމިރް ހާން ބުނެފި އެވެ.
ކާމިޔާބު އެތަކެއް ފިލްމެއް ކުޅެ، ދެ ކައިވެންޏަކަށް ތިން ކުދިން ލިބިފައިވާ އެކްޓަރު އުފަންވީ މާޗް 14، 1965 ގަ އެވެ.
ރޫޅިފައިވާ ރީނާ ދައްތާ އާއި އާމިރްގެ ކައިވެންޏަށް ލިބުނު ދެ ކުދިންގެ ތެރެއިން އަންހެން ދަރިފުޅު އިރާ ހާނަށް މިހާރު 17 އަހަރެވެ.
ފިރިހެން ދަރިފުޅު ޖުނައިދް ހާނަށް 22 އަހަރެވެ.
އޭނާ ވަނީ ބައްޕަގެ އެންމެ ހިޓް ދެ ފިލްމް ކަމަށްވާ "3 އިޑިއަޓްސް" އާއި "ޕީކޭ" ގެ އެސިސްޓަންޓް ޑައިރެކްޓަރެއްގެ ގޮތުގައި ރާޖް ކުމާރު ހިރާނީ އާ އެކު މަސައްކަތް ވެސްކޮށްފަ އެވެ.
އާމިރް މިހާރު ކައިވެނިކޮށްގެން އުޅޭ ކިރަން ރާއޯ އަށް ސަރޮގޭޓްކޮށްގެން ލިބުނު ފިރިހެން ދަރިފުޅު އާޒާދު ރާއޯ ހާނަށް 4 އަހަރެވެ.
"ޓައިމްސް އޮފް އިންޑިއާ" އަށް ދިން އިންޓަވިއުއެއްގައި އާމިރް ބުނީ ބޮލީވުޑްގެ މަޝްހޫރު އަނެއް ދެ ހާނުން ކަމަށްވާ ޝާހްރުކް ހާނާއި ސަލްމާން ހާންގެ އުމުރު ވެސް 50 އާ ގާތްކޮށްފައިވާ އިރު އެއިން އެއްވެސް އެކްޓަރަކަށް 50 އަހަރު ވާން ގާތްވެފައިވާހެން ހީ ވެސް ނުވާ ކަމަށެވެ.
"އަހަރެމެން ތިން މީހުން އަދި ވެސް ވަރަށް ޒުވާން. އަހަރަމެންގެ އުމުރު ވަނީ 18 އަހަރާއި 20 އަހަރާ ދޭތެރޭ ހުއްޓިފައި. އަހަންނަށް އިހުސާސް ކުރެވެނީ އަދި 22 އަހަރު ވެސް ނުވާހެން،" މަޖަލަކަށް ހަދާފައި އާމިރް ބުންޏެވެ. "އެހެންވެ އަހަރެން ގަބޫލް ކުރަނީ އަހަންނަށް އަދި 20 އަހަރު ކަމަށް. އެ އުމުރުގައި އުޅުނު ގޮތަށް އަދިވެސް އުޅެން ބޭނުން ވަނީ."
އާމިރް އަދި ބުނީ އޭނާ އާއި ޝާހްރުކާއި ސަލްމާން ދުވަހަކު ވެސް މުސްކުޅި ނުވާނެ ކަމަށެވެ. އެ ތިން މީހުން ވެސް އުފަންވެފައި ވަނީ 1965 ވަނަ އަހަރު އެވެ.
"ގަޔާމަތު ސޭ ގަޔާމަތު ތަކް" އިން 1988 ގައި ބޮލީވުޑަށް ނިކުތް އާމިރްގެ ކުރިއަަށް އޮތް ފިލްމް "ޑަންގާލް" ގައި އޭނާ ފެނިގެން ދާނީ ތިން ކުދިންގެ ބައްޕައެއްްގެ ރޯލުންނެވެ.
އެ ފިލްމުގައި އޭނާ ކުޅެނީ އަންހެން ދެ ކުދިންގެ ބައްޕައެއްގެ ރޯލެވެ.
މި ފިލްމުގެ ވާހަކައަކީ އިންޑިއާގެ މަޝްހޫރު ރެސްލާ މަހާވީރު ޕޯގަޓްގެ ހަޔާތުގެ މައްޗަށް ބިނާކޮށް އުފައްދާ ފިލްމެކެވެ. އަދި އޭނާއަކީ އިންޑިއާގެ އެންމެ ފުރަތަމަ އަންހެން ދެ ރެސަލަރުންގެ ބައްޕަ ވެސް މެ އެވެ. އެއީ ގީތާ އާއި ބަބީތާ ކުމާރީ ޕޯގަޓް އެވެ.
ޕޯގަޓްގެ ކެރެކްޓާ އަށް އާމިރު އަންނަނީ ވަރަށް ބޮޑެތި ތައްޔާރީތަކެއްވަމުންނެވެ. އެގޮތުން ވެޖެޓޭރިންއަކަށް ބަދަލުވެ، ބަރުދަން 68 ކިލޯ އިން 90 ކިލޯ އަށް އޭނާ ވަނީ ޖައްސައިފަ އެވެ.
ޒުވާން ބަތަލާއިންނާ އެކު މިހާރު ވެސް ފިލްމް ކުޅެމުން އަންނަ އާމިރްގެ އެންމެ ފަހުގެ ފިލްމަކީ މިދިޔަ އަހަރު ނިކުމެ، ބޮކްސް އޮފީހުގެ ރެކޯޑްތައް މުގުރާލި "ޕީކޭ" އެވެ.