ރާއްޖޭގެ އާ ރައީސް ޑރ. މުހައްމަދު މުއިއްޒު ވަގުތުން އިސްތިއުފާ ދެއްވުމަށް ޕީޕީއެމުން ރޭ ވަކިކުރި ކުރީގެ ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ގޮވާލައްވައިފި އެވެ.
އޭނަ ސޯޝަލް މީޑިއާ ޕޯސްޓެއްގައި ވިދާޅުވީ ވެރިކަމުގެ ފުރަތަމަ ދުވަހުން ފެށިގެން މުއިއްޒަށް ވެރިކަން ކުރެއްވުމުގެ ގާނޫނީ ހައިސިއްޔަތު ގެއްލިފައިވާ ކަމަށެވެ. މުއިއްޒު ރައީސްކަމުގެ ހުވާކުރެއްވީ މި މަހުގެ 17 ގަ އެވެ.
ފުރަތަމަ ދުވަހު ރައީސް ޔާމީން މިނިވަން ނުކުރެއްވި. ވެރިކަމަށް ވަޑައިގަތް ހުސް ގޮނޑި ހަދާން ނެތިއްޖެ. ޑރ.މުއިއްޒުގެ ވެރިކަމުގެ ލެގިޓިމަސީ ގެއްލިއްޖެ. ވަގުތުން ޑރ.މުއިއްޒު އިސްތިއުފާ ދެއްވުމަށް ގޮވާލަން.
— Mohamed Maleeh Jamal (@maleehjamal) November 23, 2023
"ކުރިން ވިދާޅުވި ގޮތަކަށް ރައީސްގެ ޔާމީން މިނިވަން ނުކުރެއްވި. ވެރިކަމަށް ވަޑައިގަތް ހުސް ގޮނޑި ހަނދާން ނެތިއްޖެ،" މަލީހު ވިދާޅުވި އެެވެ. "ޑރ. މުއިއްޒުގެ ވެރިކަމުގެ ލެޖިޓިމަސީ ގެއްލިއްޖެ. ވަގުތުން ޑރ .މުއިއްޒު އިސްތިއުފާ ދެއްވުމަށް ގޮވާލަން."
ރައީސް ހުވާކުރެއްވިތާ ހަފުތާއެއްހާ ދުވަހުގެ ތެރޭގައި ކުރީގެ ރައީސް އަބްދުﷲ ޔާމީން ނިސްބަތްވާ ޕީޕީއެމާއި މުއިއްޒި ނިސްބަތްވެވަޑައިގަންނަވާ ޕީއެންސީގެ މެދުގައި ކޯޅުން އުފެދި، ޕީޕީއެމްގެ ޔާމީން ފަޅިން ސަރުކާރަށް ދެކޮޅަށް ނުކުތުމަށް ފަހު، ޔާމީން ރޭ ވަނީ ޕާޓީން ވެސް ވަކިވެވަޑައިގެންފަ އެވެ. އަދި މިހާރު މަސައްކަތް ކުރައްވަނީ އާ ޕާޓީއެއް އުފެއްދެވުމަށެވެ.
މިކަމުގައި ޔާމީނާ އެކީ އެންމެ އިސްކޮށް ތިއްބެވީ މަލީހާއި ކުރީގެ ނައިބު ރައީސް އަދި ޔާމީންގެ ގާނޫނީ ވަކީލުންގެ ޓީމްގައި ހިމެނޭ ޑރ. މުހައްމަދު ޖަމީލު އަހުމަދެވެ.
މުއިއްޒުގެ އިސްތިއުފާ އަށް ރޭ ގޮވާލެއްވުމަށް ފަހު، މަލީހު ވަނީ 13 ސުވާލު ފެންމަތި ކުރައްވައި އެ ސުވާލުތަކަށް ޖަވާބު ބޭނުންވާ ކަމަށް ވެސް ވިދާޅުވެފަ އެވެ.
އެ ސުވާލުތަކަކީ:
1. ރައީސް ޔާމީންގެ ފޯނަށް ރައީސް ޑރ. މުއިއްޒު ޖަވާބު ނުދެއްވަނީ ކީއްވެ؟
2. ފުރަތަމަ ދުވަހު މިނިވަން ނުވީ ކީއްވެ؟
3. ރައީސް ޔާމީން ޕާޓީ އޮފީހަށް ވަޑަގަތީމަ ލީޑަޝިޕު ކިޔާ ބޭފުޅުން ވަޑައިނުގަތީ ކީއްވެ؟
4. ޕީޕީއެމް މެމްބަރުން ނުގެންދާނެ މޭ ކިޔާ ލ. ފުނަދޫ ކައުންސިލް އެންމެން ވެއްދީ ކީއްވެ؟
5. ތިޔަ ލީޑާޝިޕު މީހުން ކޯޓުގެ އަޑުއެހުމަށް ދިއުން ހުއްޓާލީވޭ ކީއްވެ؟
6. ވަކި އޮފީހެއް ހެދީ ކީއްވެ؟
7. ރައީސް ޑރ. މުއިއްޒުގެ ސްޕީޗްތަކުގައި ރައީސް ޔާމިންގެ ނަން ގެންނެވުން ހުއްޓާލީ ކީއްވެ؟
8. ވެރިކަން ލިބުމުގެ އުފާ ފާޅުކުރުމުގެ ރަސްމިއްޔާތަށް ސޯޝަލް ސެންޓަރަށް ރައީސް ޔާމީން އެދުމުންވެސް ނުގެންދެވީ ކީއްވެ؟
9. އެޖަ ލްސާގައި ރައީސް ޔާމީނަށް ޝުކުރު އަދާ ނުކުރީ ކީއްވެ؟
10. ޕީޕީއެމް ހައިޖެކުކުރީ ކީއްވެ؟
11. އަދުރޭ ރައީސް ޔާމީނާއި ތަފާތު އިންޒާރު ދެނީ ކީއްވެ؟
12. ޕީޕީއެމް އަދި ރައީސް ޔާމީންގެ ލޯޔަލް ބޭފުޅުން އެކަހެރި ކުރީ ކީއްވެ؟
13. ސަރުކާރު އެކުލަވާލުމުގައި ރައީސް ޔާމީންގެ ލަފަޔާ މަޝްވަރާ ނުހޯއްދަވަނީ ކީއްވެ؟
ރައީސް މުއިއްޒާއި އަދުރޭ ކައިރީ އައްސަވާ؟
ޕީޕީއެމްގެ ތެރެއިން ރައީސް މުއިއްޒާއި ސަރުކާރާ ދެކޮޅަށް ނުކުތް ނަމަވެސް މިކަމ ބެހޭ ގޮތުން ސަރުކާރުން މިހާތަނަށް އަދި އެއްޗެއް ނުބުނެ އެވެ.