އާ ސަރުކާރުން ދިރާސީ އާ އަހަރު ފެށުން ޖެނުއަރީ އަށް ބަދަލުކުރަން މަސައްކަތްކުރާތީ އެކަމާ ގުޅޭ ގޮތުން އެޑިއުކޭޝަން މިނިސްޓަރު ޑރ. ޑރ. އިސްމާއީލް ޝަފީއު ރައްޔިތުންގެ މަޖިލީހަށް ހާޒިރުކުރަން ހުށަޅައިފި އެވެ.
އެކަމާ ގުޅޭ ގޮތުން މިނިސްޓަރާ ސުވާލުކުރަން ހުށަހެޅުއްވީ އައްޑޫ މީދޫ ދާއިރާގެ މެންބަރު ރޮޒައިނާ އާދަމް (ރޮޒޭ) އެވެ.
ސަރުކާރުން ދިރާސީ އަހަރު ފެށުން ޖެނުއަރީ އަށް ބަދަލުކުރަން ވިސްނުން ގެންގުޅޭ ކަމަށް އާ މިނިސްޓަރު ވިދާޅުވެފައި ވަނީ މިދިޔަ ހަފުތާގައި ސްކޫލްތަކެއްގެ ޕްރިންސިޕަލުންނާ އެކީ ބޭއްވި ބައްދަލުވުމުގަ އެވެ. އެ ބައްދަލުވުމުގައި ޕްރިންސިޕަލުންތަކެއް ވަނީ ދިރާސީ އަހަރު ފެށުން އަހަރުގެ މެދުތެއަށް ކުރީގެ ސަރުކާރުން ބަދަލުކުރީ މާ ބޮޑު ދިރާސާއެއްގެ މައްޗަށް ނޫން ކަމަށް ވެސް ފާހަގަކުރައްވައިފަ އެވެ.
މިނިސްޓަރު ވިދާޅުވެފައިވާ ގޮތުގައި މީގެ ކުރިން ވެސް ރާއްޖޭގައި ދިރާސީ އަހަރު ފެށުން ޖެނުއަރީގައި އޮތް ގޮތަށް އެ ބަދަލު ގެންނާނީ 2025 ގަ އެވެ.
ރައީސް އިބްރާހީމް މުހައްމަދު ސޯލިހުގެ ސަރުކާރުން ދިރާސީ އަހަރު ފެށުން އަހަރުގެ މެދުތެއަށް ބަދަލުކުރީ 2020 ގައި ކުރިމަތިލާން ޖެހުނު ކޮވިޑް-19 ގެ ބަލިމަޑުކަމާ ވިދިގެން ތައުލީމީ ދާއިރާގެ ކަންކަމަށް ގެންނަން ޖެހުނު ބަދަލުތަކާ ގުޅިގެން 2021 ގަ އެވެ.
ދިރާސީ އަހަރު ފެށުން ޖެނުއަރީ އަށް ބަދަލުކުރުމުގެ ވިސްނުން އާ ސަރުކާރުން ގެންގުޅޭތީ ކުރީގެ އެޑިއުކޭޝަން މިނިސްޓަރު ޑރ. އައިޝަތު އަލީ އެކަމަށް ފާޑު ވިދާޅުވި އެވެ. ދިރާސީ އާ އަހަރު ޖެނުއަރީ އަށް ބަދަލުކުރުމަކީ މިހާރުގެ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.