މިހާރު ވެރިކަން ކުރާ ޕާޓީ، ޕީއެންސީއާ އިތިރު 1،000 މީހަކު ގުޅިފައިވާ ކަމަށް އެ ޕާޓީން ބުނެފި އެވެ.
އަލަށް ޕާޓީ ސޮއިކުރި މީހުންގެ ފޯމުތަކާ ހަވާލުވެވަޑައިގަތީ އަބްދުއްރަހީމް އަބްދުﷲ (އަދުރޭ) އެވެ. މިކަން ޕީއެންސީގެ ފޭސްބުކް ޕޭޖްގައި ހިއްސާކުރި ނަމަވެސް ޕާޓީއާ އަލަށް ގުޅުނު އިތުރު 1،000 މީހުންނަކީ ކޮން ހިސާބަކުން ސޮއިކުރި ބައެއް ކަމަށް ހާމަކޮށްފައެއް ނުވެ އެވެ.
ރާއްޖޭގެ އެކި ހިސާބުތަކަށް ނިސްބަތްވާ މީހުން ޕާޓީ އަށް ސޮއިކޮށް ފޯމްޔައް ހަވާލުކުރަމުން އަންނަ ވާހަކަ ޕީއެންސީގެ ޕޢޖްގައި އަޕްޑޭޓް ކުރަމުން ދެ އެވެ.
އެ ޕާޓީން މިހާރު އަމާޒު ހިފާފައި ވަނީ މެންބަރުންގެ އަދަދު ވީހާ ވެސް އަވަހަކަށް 10،000 އަށް އެރުވުމެވެ. ޕީއެންސީ އަށް މެންބަރުން އިތުރު ކުރުމުގެ މަސައްކަތް ބާރަށް ފެށުނީ ސެޕްޓެމްބަރުގައި ބޭއްވި ރިޔާސީ އިންތިހާބު ރައީސް ޑރ. މުހައްމަދު މުއިއްޒު ކާމިޔާބުކުރެއްވުމާ ގުޅިގެންނެވެ.
ޕީއެންސީ އަށް މެންބަރުން އިތުރު ކުރަމުން އަންނަ އިރު، އަންނަ އަހަރު ބާއްވާ ރައްޔިތުންގެ މަޖިލިސް އިންތިހާބަށް ޕީޕީއެމާއި ޕީއެންސީ އެކީގައި ނުކުންނަން ވަނީ ނިންމައިފަ އެވެ. އެ ކޯލިޝަނުން ބުނެފައި ވަނީ އަމާޒަކީ ސަރުކާރުގެ ސިޔާސަތުތައް ތަންފީޒުކުރަން ފަސޭހަކުރުމަށްޓަކައި މަޖިލީހުގެ މެޖޯރިޓީ ހޯދުމެވެ.