ރައީސް ޑރ. މުހައްމަދު މުއިއްޒު މިއަދު ތުރުކީ އަށް ފުރާވަޑައިގެންފި އެވެ.
މިއީ މި މަހުގެ 17 ގައި ރައީސްކަމުގެ ހުވާކުރެއްވުމަށް ފަހު، މުއިއްޒު ރާއްޖެ އިިން ބޭރަށް ކުރައްވާ ފުރަތަމަ ރަސްމީ ދަތުރެވެ. މި ދަތުރުގައި މަނިކުފާނުގެ އަނބިކަނބަލުން ސާޖިދާ މުޙައްމަދު ވެސް ބައިވެރިވެވަޑައިގަންނަވަ އެވެ.
ރައީސްގެ ދެކަނބަލުން ތުރުކީ އަށްކުރައްވާ މި ދަތުރަކީ އެ ގައުމުގެރައީސް ރަޖަބް ޠައްޔިބް އުރްދުޣާންގެ ދަޢުވަތަކަށް ކުރައްވާ ދަތުރެކެވެ. މި ދަތުރުގައި ތުރުކީގެ ސަރުކާރުގެ އިސް އޮފިޝަލުންނާ ބައްދަލުކުރައްވައި ދެ ގައުމުން އިސްކަންދޭ މުހިންމު ދާއިރާތަކުން އެއްބާރުލުން އިތުރު ކުރެވިދާނެ ގޮތްތަކާ ގުޅޭގޮތުންނާއި، ދެ ގައުމުގެ ދޭދޭ ގުޅުން އިތުރަށް ބަދަހި ކުރެވިދާނެ ގޮތްތަކާ ގުޅޭ ގޮތުން މަޝްވަރާކުރުމަށް ހަމަޖެހިފައިވެ އެވެ.
ރައީސްގެ މި ދަތުރުގައި ސަރުކާރުގެ މަތީފަންތީގެ ވަފުދެއް ބައިވެރިވެވަޑައިގަންނަވަ އެވެ.
ތުރުކީ ދަތުރު ނިންމަވާލައްވައި ރައީސް ރާއްޖެ ވަޑައިގަތުމަށް ހަމަޖެހިފައިވަނީ މި މަހުގެ 30 ގައި ޔޫއޭއީގައި ބޭއްވުމަށް ހަމަޖެހިފައިވާ ޔުނައިޓެޑް ނޭޝަންސް ކްލައިމެޓް ޗޭންޖް ކޮންފަރެންސް (ކޮޕް-28) ގައި ވެސް ބައިވެރިވެވަޑައިގަތުމަށް ފަހު އެވެ.