ކުރީގެ ރައީސް އަބްދުﷲ ޔާމީން އިސްވެ އަލަށް އުފައްދަވާ ޕާޓީގެ މުޢައްސިސަކީ ޔަމީންގެ ދަރިކަލުން ޒެއިން ކަމަށް އެ ޕާޓީގެ އުފެއްދެވުމުގައި ހަރަކާތްތެރިވާ ފަރާތްތަކުން ބުނެފިއެވެ.
އެ ޕާޓީ އުފެއްދުމުގެ މަސައްކަތް މިހާރު ކުރަމުންދާއިރު، ޕާޓީ އުފެއްދުމާއި ގުޅޭ ކަންކަމުގައި އިލެކްޝަން ކޮމިޝަނާއި ވަނީ ބައްދަލު ކުރައްވާފައެވެ. މި ބައްދަލުވުމުގައި ޔާމީން ޕީޕީއެމް ތެރެއިން ނަންގަވާފައިވާ 13 މެންބަރުންގެ ކޮމެޓީގައި ތިއްބެވި ބޭފުޅުން ހިމެނެއެވެ. އޭގެ ތެރެއިން އިސްކޮށް ހަރަކާތްތެރިވަނީ ކުރީގެ މިނިސްޓަރ މުހައްމަދު މަލީހް ޖަމާލް އަދި ރައީސް ޔާމީންގެ އިސް ވަކީލް އަދި ކުރީގެ ނައިބް ރައީސް ޑރ. މުހައްމަދު ޖަމީލް އަހުމަދުއެވެ.
މިއަދު އެލެކްޝަން ކޮމިޝަނާއި އެކު އެބޭފުޅުން ބޭއްވި ބައްދަލުވުމަށް ފަހު ނޫސްވެރިންނާއި ވާހަކަ ދައްކަވަމުން މަލީޙް ވިދާޅުވީ ރައީސް ޔާމީންގެ ފަރާތްޕުޅުން 8 ބޭފުޅުން ޕާޓީގެ މުޢައްސިސުންގެ ގޮތުގައި ތިބުމަށް ބޭނުން ކަމަށެވެ. ނަމަވެސް އީސީގެ ޤަވާއިދުގެ ތެރެއިން މިހާރު ރެޖިސްޓަރ ކުރެވެނީ އެއް ބޭފުޅެއްގެ ނަންމަތީގައި ކަމުން، މުޢައްސިސުންގެ ތެރެއިން ރެޖިސްޓަރ ކުރަނީ ރައީސް ޔާމީންގެ ދަރިކަލުން ޒެއިން އަބްދުﷲ ޔާމީން ނަންމަތީގައި ކަމަށް ވިދާޅުވިއެވެ.
އޭގެ އިތުރުން ދެން މުއައްސިސުންގެ ގޮތުގައި ތިއްބަވާނީ ޔާމީނާއި ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދާއި ކުރީގެ ސީޕީ ހުސައިން ވަހީދާއި ކުރީގެ މުލިއާގޭގެ ޗީފް އޮފް ސްޓާފް އަހުމަދު މުސްތަފާ އަދްލީ އިސްމާއީލް އާއި ޑރ. ޖިހާދު ހަސަނާއި ކަކާގޭ އަލީ އާދަމް ކަމަށް އެ ޕާޓީގެ ފަރާތުން ހާމަކުރައްވައެވެ.
އާ ސިޔާސީ ޕާޓީއެއް އުފެއްދުމާ ގުޅޭގޮތުން މަޝްވަރާކުރެއްވުމަށް އެޕާޓީ އުފެއްދެވުމުގައި އިސްކޮށް ޙަރަކާތްތެރިވާ ފަރާތްތަކުން އިލެކްޝަންސް ކޮމިޝަނާ މިއަދު ބައްދަލު ކުރައްވައިފި pic.twitter.com/7UvLjoFZMi
— Elections Commission (@ElectionsMv) November 26, 2023
މަލީހް ވިދާޅުވީ މިއަދު އައީ ސީދާ ޕާޓީ އުފެއްދުމުގެ ހުއްދަ ހޯދުމަށް ކަމަށާއި، ނަމަވެސް ކުށުގެ ރެކޯޑުތައް އެއްކޮށް ސާފުކޮށް ނުނިމޭތީވެ އީސީގެ މެންބަރުންނާއި އެކު މަޝްވަރާތައް ކުރިއަށް ގެންދެވިފައިވާ ކަމަށެވެ. އަދި އީސީގެ ފަރާތުން މި މަރުހަލާއަށް ފުރިހަމަ އެއްބާރުލުން ލިބޭނެ ކަމަށް އެ ފަރާތުން ޔަޤީންކަން ދެއްވާފައިވާ ކަމަށް ވިދާޅުވިއެވެ.
މީގެ އިތުރުން ޕާޓީއެއް ހެދުމުގެ ރެކޯޑު މުގުރާލާއި ހުރިހާ އިންތިހާބެއްގައިވެސް ފުރިހަމައަށް ވާދަ ކުރައްވާނެ ކަމަށް މަލީހު ވަނީ އިއުލާން ކުރައްވާފައެވެ. އެގޮތުން މާލޭގެ މޭޔަރު ކަމަށާއި، މަޖިލިސް އިންތިހާބަށް ވާދަ ކުރައްވާނެ ކަމަށް ވިދާޅުވިއެވެ.
ޔާމީންގެ އައު ޕާޓީގެ ނަމަކީ ޕީޕަލްސް ނޭޝަނަލް ފްރަންޓް ނުވަތަ ޕީއެންއެފް އެވެ. މިޕާޓީގެ ލޯގޯ އަދި ޕާޓީގެ ނަން ރޭ ވަނީ އާންމުކޮށްފައެވެ. އަދި މިހާރު ޕާޓީއާއި ގުޅޭނެ ފަރާތްތައް ހޯދުމަށް ވަނީ މަސައްކަތް ފަށާފައެވެ. މަލީހު ވިދާޅުވީ އީސީއަށް ފޯމު ހުށަހަޅާނީވެސް ގިނަ މެންބަރުންގެ ފޯމުތަކަކާއި އެކުގައި ކަމަށެވެ.