ޕީޕަލްސް ނޭޝަނަލް ފްރަންޓް އަކީ ދެން ވެރިކަން ކުރާނެ ޕާޓީ ކަމަށް އެ ޕާޓީގެ އުފެއްދުމުގައި އިސްކޮށް ހަރަކާތްތެރިވާ ކުރީގެ ނައިބް ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ރައީސް ޔާމީންގެ އައު ޕާޓީ އުފެއްދުގެ ކަންކަމުގައި މިއަދު އިލެކްޝަންސް ކޮމިޝަނަށް ވަޑައިގެން ބޭއްވި ބައްދަލުވުމަށް ފަހު ނޫސްވެރިންނާއި ވާހަކަ ދައްކަވަމުން ޑރ. ޖަމީލް ވަނީ ޕާޓީއަކީ ރާއްޖޭގެ ސިޔާސީ މައިދާނުގައި އުފެދިގެންދާ އެންމެ ބިޔަ ބޮޑު ޕާޓީއަށް ވެގެން ދާނެ ކަމަށް ވިދާޅުވެފައެވެ.
"މި ވެގެންދާނީ ދިވެހިރާއްޖޭގެ ސިޔާސީ މައިދާނުގައި އިރާދަ ކުރެއްވީއްޔާ އުފެދިގެންދާ އެންމެ ވަރުގަދަ ބިޔަބޮޑު ޕާޓީއަށް މާތްﷲ ރަހުމަތާއި އެކީގައި. އަޅުގަނޑުމެންގެ މި ޕާޓީއަކީ ދިވެހިރާއްޖޭގެ ދެން ވެރިކަން ކުރާނެ ޕާޓީ މާތްﷲ ގެ ތަނަވަސް ރަހުމަތާއި އެކީގައި." ޖަމީލް ވިދާޅުވިއެވެ.
ޖަމީލް ވަނީ ސިޔާސީ މައިދާނުގައި މިދިޔަ ދުވަސްތަކުގައި އެންމެ ބޮޑަށް ޤުރުބާންވެ ވަޑައިގަތީ ރައީސް ޔާމީން ކަމަށް ވިދާޅުވެފައެވެ. އެގޮތުން ޖަލުގައި އޮންނެވުމާއި އެކު ގޮނޑި ދެއްކެވީ ޔާމީން ކަމަށް ވިދާޅުވިއެވެ. މިއިންތިހާބަށް ކާމިޔާބު ވުމަށް ފަހު ޝުކުރު ލަފްޒެއް ލީޑާޝިޕްގެ އެއްވެސް ބޭފުޅަކު އަދާ ނުކުރައްވާ ކަމަށާއި އަރިހަށް ވަޑައިވެސް ނުގަންނަވާ ކަމަށް ވިދާޅުވިއެވެ.
"ރައީސް ޔާމީންގެ އަސްލު ހަގީގީ ވަފާތެރިންނާއި، އަސްލު ހަޤީޤީ އެކުވެރިންނާއި އެކު މިފަށާ ސިޔާސީ ދަތުރު ވެގެންދާނީ ދިވެހި ރާއްޖެ ބަދަލު ކޮށްލާނެ ސިޔާސީ ދަތުރަކަށް އިރާދަ ކުރެއްވީއްޔާ " ޖަމީލް ވިދާޅުވިއެވެ.
ވެރިކަން ކުރާ ޕީޕީއެމް/ޕީއެންސީގެ ލީޑާޝިޕާއި ރާއީސް ޔާމީން މައްސަލަ ޖެހި، ވަކި ޕާޓީއެއް އުފެއްދުމުގެ މަސައްކަތް މިހާރު ފަށާފައިވާއިރު އެ ޕާޓީގެ ވަރަށް އަވަހަށް ރެޖިސްޓަރ ކުރަން ހުށަހަޅާނެ ކަަމަށް ޕާޓީގެ އުފެއްދުމުގައި އިސްކޮށް ހަރަކާތްތެރިވާ ފަރާތްތަކުން ބުނެއެވެ. އަދި ޕާޓީއިން މޭޔަރު ކަމަށާއި މަޖިލީހަށްވެސް ވާދަ ކުރާނެ ކަމަށް ވަނީ އިއުލާން ކޮށްފައެވެ.