އައްޑޫގެ ވަކިން އޮންނަ ހުޅުމީދު އާއި ހިތަދޫ ގުޅައިލަން ހަދަން ނިންމާފައިވާ ބްރިޖް މަޝްރޫއާ ގުޅޭ އިދާރީ މަސައްކަތްތައް ފަށާފައިވާ ކަމަށް ސަރުކާރުން ބުނެފި އެވެ.
ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ފީއެސްއެމްގައި ވިދާޅުވީ ރައީސްގެ ޑރ. މުހައްމަދު މުއިއްޒުގެ ވިސްނުންފުޅާ އެއްގޮތަށް، އައްޑޫގެ ބުރިޖު މަޝްރޫއު ވާނީ ކޮންސްޓްރަކްޝަން މިނިސްޓްރީން އެންމެ އިސްކަން ދޭނެ އެއް މަޝްރޫއަށް ކަމަށެވެ.
މި މަޝްރޫއަކީ އާ ސަރުކާރުގެ "ހަފްތާ 14" ނުވަތަ 100 ދުވަހުގެ ޕްލޭންގައި ހިމެނޭ މަޝްރޫއެއް ވެސް މެ އެވެ.
މުއްތަލިބް ވިދާޅުވީ އައްޑޫ ބްރިޖް މަޝްރޫއާ ގުޅޭ ޢަމަލީ މަސައްކަތަށް ވާސިލްވުމަށް ބޭނުންވާ، އިދާރީ މަސައްކަތްތައް މިހާރު މިނިސްޓްރީން ފަށާފައިވާ ކަމަށެވެ. އެގޮތުން މި މަޝްރޫއު ކުރިއަށް ގެންދާނެ ގޮތެއް ކަނޑައެޅުމަށް ކޮންސަލްޓަންޓެއް ހަމަޖެއްސުމުގެ މަސައްކަތްތައް ކުރިއަށްދާ ކަމަށް ވެސް ވިދާޅުވި އެވެ.
މިނިސްޓަރު ވިދާޅުވި ގޮތުގައި އައްޑޫ ބްރިޖް މަޝްރޫއަކީ ވަރަށް ގިނަ ޓެކްނިކަލް ކަންތައްތަކެއް ހިމެނޭ ބިޔަ މަޝްރޫއެއް ކަމަށެވެ. އެހެންވެ އޭގެ ޢަމަލީ މަސައްކަތް ފެށޭ ވަރު ވާނީ ވަރަށް ގިނަ ދިރާސާތަކާއި ނިންމުންތަކަކަށް ފަހު ކަމަށް ވިދާޅުވި އެވެ. އެގޮތުން ފީސިބިލިޓީ ސްޓަޑީތަކާއި، ދިރާސާތަކާއި، ޑިޒައިނާއި އަދި އާއްމުންގެ ޚިޔާލު ވެސް މިކަމަށް ހޯދަން ޖެހޭކަން މުއްތަލިބް ފާހަގަކުރެއްވި އެވެ.
"ބުރިޖުގެ މަސައްކަތެއްވީމަ މިއީ ވަރަށް ބޮޑު މަސައްކަތެއް. މަސައްކަތް ކުރިއަށް ގެންދެވޭނެ ޓައިމްލައިނެއް އިނގޭނީ ހުރިހާ ދިރާސާތަކަށާއި، އިދާރީ މަސައްކަތްތަކަށް ފަހު،" އޭނަ ވިދާޅުވި އެވެ. "[އައްޑޫ ރައްޔިތުންނަށް] ޔަގީންކަން ދެނީ މިއީ އެންމެ އިސްކަންދޭ އެއް މަޝްރޫއަށް ވާނެކަން."
ހުޅުމީދު އާއި ހިތަދޫ ގުޅައިލާ ބްރިޖް ހެދުމަށް އަންނަ އަހަރުގެ ބަޖެޓުގައި 30 މިލިއަން ރުފިޔާ ވެސް ހިމަނާފައިވެ އެވެ. މި ބްރިޖަކީ ރައީސްގެ މުއިއްޒުގެ ރިޔާސީ ވައުދެކެވެ.