އާމިރް ހާން އޭލިއަންގެ ރޯލުން ފެނިގެން ދިޔަ ކާމިޔާބު ފިލްމް "ޕީކޭ" ގެ ރައިޓްސް ގަންނަން ބައެއް ފަރާތްތަކުން ވާހަކަ ދައްކަމުން އަންނަ ކަމަށާއި އެކަމަކު އަދި އެއްވެސް ފަރާތަކަށް އެ ފިލްމުގެ ރައިޓްސް ވިއްކާ ނުލާ ކަމަށް ޑައިރެކްޓަރު ރާޖު ކުމާރު ހިރާނީ ބުނެފި އެވެ.
ވިންދޫ ވިނޯދް ޗޯޕްޅާ ޕްރޮޑިއުސްކޮށްފައިވާ އެ ފިލްމުގެ ރައިޓްސް ގަތުމަށް އިންޑިއާގެ ސައުތު ފިލްމް އިންޑަސްޓްރީގެ އެކި ފަރާތްތަކުން އަންނަނީ ވާހަކަ ދައްކަމުންނެވެ. އެކަން ހިރާނީ ވެސް ކަށަވަރުކޮށް ދިނެވެ.
"ބައެއް ފަރާތްތަކުން ފިލްމްގެ ރައިޓްސް ގަތުމަށް ހުށަހަޅާފައި އެބަހުރި. އަދި ބައެއް ފަރާތްތަކުން މިހާރު ވެސް އަންނަނީ މިކަމާ ބެހޭ ގޮތުން ވާހަކަ ދައްކަމުން،" މިދިޔަ އަހަރުގެ ރިލީޒްކޮށް ބޮކްސް އޮފީހުގެ ރެކޯޑްތައް ވެސް މުގުރާލި ""ޕީކޭ" ގެ ޑީވީޑީ ލޯންޗް ކުރަން ބޭއްވި ހަފުލާގައި ޑައިރެކްޓަރު ބުންޏެވެ. "އެކަަމަކު އަދި އެއްވެސް ފަރާތަކަށް ރައިޓްސް ވިއްކައެއް ނުލަން. މަޝްވަރާތައް ދަނީ ކުރިއަށް."
"ޕީކޭ" ރިލީޒް ކުރި ދުވަސްވަރު އެ ފިލްމަަށް ވަރަށް ގިނަ ފާޑު ކިއުންތައް އަމާޒުވެ، ފިލްމާ ދެކޮޅަށް އެކި ކަހަލަ ހަރަކާތްތައް ވެސް ހިންގާފައިވެ އެވެ.
ބައެއް ފަރާތްތަކުން ބުނާ ގޮތުގައި އެ ފިލްމަކީ ހިންދޫގެ ކަލާނގެ އަށް ހަޖޫ ޖަހައި، ހާއްސަކޮށް އެ ދީނަށް ފުރައްސާރަކޮށްފައިވާ ފިލްމެކެވެ.
މިކަމަށް އިޝާރާތްކޮށް އާމިރް ބުނީ "ޕީކޭ" ގެ ސަބަބުން އެއްވެސް މީހެއްގެ ހިތުގައި ޖެހިފައިވާ ނަމަ އެކަމަށް އޭނާ އަމިއްލަ ގޮތުން މައާފަށް ވެސް އެދޭ ކަމަށެވެ.
"މިއީ އެއްވެސް ބަޔަކާ ދެކޮޅަށް ނުވަތަ އެއްވެސް ބައެއްގެ ފިކުރަކަށް ޖެއްސުން ކުރުމުގެ ގޮތުން ގެނެސް ދީފައިވާ ފިލްމެއް ނޫން. އެކަން އެގޮތަށް އެއްވެސް ބަޔަކަށް އިހުސާސް ކުރެވޭނެ ނަމަ އަހަރެން އެކަމަށް މައާފަށް ވެސް އެދެން،" ޑީވީޑީ ލޯންޗިން ހަފުލާގައި އާމިރް ބުންޏެވެ.
ހިންދީ ބަހުން އުފެއްދި "ޕީކޭ" ތަމަޅަ، މަލަޔާޅަމް އަދި ކަންނާޑާ ފަދަ ބަހުރުވައިން އުފެއްދުމަށް ސައުތު ފިލްމް އިންޑަސްޓްރީގެ ޕްރޮޑިއުސަރުން ވަނީ ވަރަށް ބޮޑަށް ޝައުގުވެރިކަން ފާޅުކޮށްފަ އެވެ.
ބައެއް މީޑިއާ ރިޕޯޓްތައް ބުނާ ގޮތުން "ޕީކޭ" ރިމެކިންއެއް އެންމެ އަވަހަށް ފެނުން ގާތީ ތަމަޅަ ބަހުންނެވެ. އަދި އެ ފިލްމުގެ ލީޑް ރޯލް ވަނީ ސްޕަސްޓާ ކަމަލް ހަސަން އަށް ހުށަހަޅައިފަ އެވެ.
"ޕީކޭ" ރިމެކް ކުރަން ސައުތުގެ ގިނަ ޕްރޮޑިއުސަރުންތަކެއް ކެތްމަދުވެފައި ތިބި އިރު، އާމިރް ހިމަނައިގެން 2009 ގައި ހިރާނީ ގެނެސް ދިން "3 އިޑިއަޓްސް" ވެސް ވަނީ އިންޑިއާގެ އެހެން ބަހުރުވަތަކުން އުފައްދައި ބެލުންތެރިންނާ ހަމައަށް ގެނެސް ދީފަ އެވެ.
ހިރާނީ ދެން ފިލްމެއް ހަދާނީ އެކްޓަރު ސަންޖޭ ދަތުގެ ހަޔާތުގެ މައްޗަށް ބިނާކޮށެވެ. އެ ފިލްމުގެ ސްކްރިޕްޓްގެ މަސައްކަތް މިހާރު ކުރިއަށްދާ އިރު ސަންޖޭގެ ރޯލް ކުޅޭނީ ރަންބީރު ކަޕޫރެވެ.