ކުރީގެ ރައީސް އަބްދުﷲ ޔާމީން އިސްކޮށް ހުންނަވައިގެން އުފައްދަވަން މިހާރު މަސައްކަތް ފަށާފައިވާ ޕާޓީ، ޕީޕަލްސް ނެޝަނަލް ފްރޮންޓް (ޕީއެންއެފް) އަށް ސޮއި ހޯދުމުގެ މަސައްކަތް ފަށައިފި އެވެ.
މި މަސައްކަތް އެ ޕާޓީން ރޭ ރަސްމީކޮށް ފެށުމާ އެކީ، ޔާމީން ވެސް ވަނީ ޕާޓީ އަށް ސޮއިކުރައްވައިފަ އެވެ.
ޕީއެންއެފް އުފެއްދުމުގެ ހުއްދަ އިލެކްޝަން ކޮމިޝަން (އީސީ) ގައި އެދުނި އިއްޔެ އެވެ. ޕާޓީ ރަޖިސްޓްރީކުރަން މަދުވެގެން 3،000 މީހުންގެ ސޮއި ބޭނުން ވާނެ އެވެ، އެހެންވެ ޕީއެންއެފުން މިހާރު އަންނަނީ އެ މަސައްކަތް ބާރަށް ކުރަމުންނެވެ.
މި ޕާޓީގެ މުއައްސިސަކީ ޔާމީންގެ ދަރިކަލުން ޒެއިން ޔާމީނެވެ. އާ ޕާޓީގެ ކަންކަމުގައި ދެން އެންމެ އިސްކޮށް އުޅުއްވަނީ ކިރީގެ ނައިބު ރައީސް ޑޜ. މުހައްމަދު ޖަމީލު އަހުމަދާއި ކުރީގެ މިނިސްޓަރު މުހައްމަދު މަލީހު ޖަމާލެވެ.
ޔާމީން އިސްކޮށް ހުންނަވައިގެން އާ ޕާޓީއެއް އުފައްދަވަން ނިންމެވީ އެ މަނިކުފާނު ކުރިން ހުންނެވި ޕީޕީއެމުން ވަކިވެވަޑައިގަތުމަށް ފަހު، އެވެ. އެ ޕާޓީ އަކީ ރާއްޖޭގައި ދެވަނަ އަށް އެންމެ ބޮޑު ޕާޓީ އެވެ.
ޕީޕީއެމްގެ ޓިކެޓްގައި މި އަހަރުގެ ރިޔާސީ އިންތިހާބަށް ވާދަކުރައްވަން ވެސް ޔާމީން ހުށަހެޅުއްވި އެވެ. އެކަމަކު އެ މަނިކުފާނު 11 އަހަރުގެ ހުކުމެއް ތަންފީޒު ކުރައްވަމުން ގެންދަވާތީ އިންތިހާބުގައި ވާދަކުރެއްވުމުގެ ފުރުސަތު ވަނީ ގެއްލިވަޑައިގެންފަ އެވެ.
ރާއްޖޭގައި އެންމެ ފަހުން އުފެއްދި ޕާޓީ އަކީ ކުރީގެ ރައީސް މުހައްމަދު ނަޝީދު އިސްކޮށް ހުންނަވައިގެން އުފެއްދެވި، ދަ ޑިމޮކްރެޓްސް އެވެ. އެ ޕާޓީން މި އަހަރުގެ ރިޔާސީ އިންތިހާބުގައި ވެސް ވާދަކުރި އެވެ.