މާލޭގެ މޭޔަރުގެ މަގާމު ހުސްވެފައިވާތި އެ މަގާމަށް ބޭފުޅަކު އިންތިހާބުކުރަން ބާއްވަން ހަމަޖެހިފައިވާ ބައި-އިލެކްޝަން ޖެނުއަރީ މަހުގެ 13 ގައި ބާއްވަން ނިންމައިފި އެވެ.
އިލެކްޝަން ކޮމިޝަން (އީސީ) އިން ބުނީ އެ ބައި-އިލެކްޝަން ވާދަކުރަން ބޭނުންވާ ފަރާތްތަކަށް މާދަމާ ހުޅުވައިލާނެ ކަމަށެވެ. އަދި ކެންޑިޑޭސީ ހުށަހެޅުމުގެ އެންމެ ފަހު ސުންގަޑި އަކީ އަންނަ މަހުގެ 13 އެވެ.
މާލޭގެ މޭޔަރުކަމުގެ މަގާމު ހުސްވީ އެ މަގާމުގައި ހުންނެވި ޑރ. މުހައްމަދު މުއިއްޒު ރިޔާސީ އިންތިހާބުގައި ވާދަކުރައްވައި ކާމިޔާބު ކުރެއްވުމާ ގުޅިގެންނެވެ. އެ މަނިކުފާނު ރައީސްކަމުގެ ހުވާކުރެއްވީ މި މަހުގެ 17 ގަ އެވެ.
މާލޭގެ މޭޔަރު ކަމަށް ވާދަކުރައްވަން ނިންމަވާފައިވާ ބޭފުޅުންގެ ތެރޭގައި ރައީސް އިބްރާހީމް މުހައްމަދު ސޯލިހުގެ ސަރުކާރުގެ ޔޫތު މިނިސްޓަރު އަހުމަދު މަހުލޫފާއި ކުރީގެ އެޓާނީ ޖެނެރަލް އާޒިމާ ޝަކޫރާއި ކުރީގެ ޕޮލިސް ކޮމިޝަނަރު ހުސައިން ވަހީދުގެ އިތުރުން މާލެ ސިޓީ ކައުންސިލްގެ މެންބަރެއްގެ ގޮތުގައި ހުންނެވި ސައިފު ފާތިހު ހިމެނެ އެވެ. ސައިފަކީ ދަ ޑިމޮކްރެޓްސް އިން ވާދަކުރައްވާ ކެންޑިޑޭޓެވެ.
މޭޔަރު ކަމަށް ވާދަކުރައްވާ އާޒިމާ އަށް ރައީސް މުއިއްޒުގެ ތާއީދު އޮތްކަން ހާމަކުރައްވާފައިވެ އެވެ.
އީސީން ބުނީ މޭޔަރު ޖެނުއަރީ 13 ގައި އިންތިހާބު ކުރުމަށް ފަހު، ބައި-އިލެކްޝަންގެ ރަސްމީ ނަތީޖާ އެ މަހުގެ 15 ގައި އިއުލާން ކުރާނެ ކަމަށެވެ.
މާލޭގެ މޭޔަރު ހޮވަން ބައި-އިލެކްޝަން ޖެނުއަރީގައި ބާއްވާ އިރު، ސަރުކާރުފެ މަގާމުތަކަށް ވަޑައިގަންނަވަން ބައެއް ކައުންސިލުން އިސްތިއުފާ ދެއްވާފައިވެ އެވެ.