ސަރުކާރުގެ ބައެއް ކުންފުނިތަކުގެ މެނޭޖިން ޑިރެކްޓަރުންގެ އައްޔަން ކުރަން ޕްރައިވެޓައިޒޭޝަން ބޯޑަށް ސަރުކާރުން ފޮނުވައިފި އެވެ.
އެ ބޯޑަށް ވެސް އާ ސަރުކާރުން ވަނީ މެންބަރުންތަކެއް އައްޔަންކޮށްފަ އެވެ.
އެގޮތުން މިހާރު ހަ ކުންފުންޏެއްގެ އެމްޑީންގެ މަގާމަށް އައްޔަންކުރަން ނަންތަކެއް ވަނީ ޕީސީބީ އަށް ފޮނުވައިފަ އެވެ.
މީގެ ތެރޭގައި ހިމެނެނީ ރީޖަނަލް އެއާޕޯޓްސްގެ މެނޭޖިން ޑިރެކްޓަރުކަމަށް ބިލެތްދޫ ދާއިރާގެ ކުރީގެ މެމްބަރު އަހުމަދު މުބީން، ދައުލަތުގެ މީިޑިއާ، ޕީއެސްއެމްގެ މެނޭޖިން ޑިރެކްޓަރުގެ މަގާމަށް ބްރޯޑްކާސްޓިން ކޮމިޝަންގެ ކުރީގެ މެންބަރު ޒީނާ ޒާހިރު، ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ ސީއީއޯގެ މަގާމަށް ޕީޕީއެމް/ޕީއެންސީގެ ތަރުޖަމާނު ހީނާ ވަލީދު، އާސަންދަ ކުންފުނީގެ މެނޭޖިން ޑިރެކްޓަރުކަމުގެ މަގާމަށް ހެންވޭރު ދެކުނު ދާއިރާގެ އެމްޑީޕީގެ ކުރީގެ މެމްބަރު މުހައްމަދު އަބްދުލްކަރީމް (ރުކުމާ)، އާބަންކޯގެ އެމްޑީއަކަށް ޕީއެންސީގެ ޕީޖީ ލީޑަރު އަދި ފެލިދޫ ދާއިރާގެ މެމްބަރު އިބްރާހީމް ފަޒުލް ރަޝީދު، ފެނަކަ ކޯޕަރޭޝަންގެ މެނޭޖިން ޑިރެކްޓަރަކަށް ޕީޕީއެމްގެ ސެނެޓް މެމްބަރު އަދި ރައްޔިތުންގެ މަޖިލީހުގެ މަޑަވެލީ ދާއިރާގެ ކުރީގެ މެމްބަރު މުއާޒު މުހައްމަދު ރަޝީދެވެ.