މޯލްޑިވްސް އިމިގްރޭޝަނުން ދިވެހިންނަށް ބޭރަށް ދަތުރު ކުރާއިރު އިމިގްރޭޝަން ކްލިއަރެންސް ހެދުމަށް އީ-ގޭޓް ޚިދުމަތް ބޭނުން ކުރެވޭ ގޮތް ހަދާފައިފިއެވެ.
މިއަދު މިކަން އިއުލާންކޮށް އިމިގްރޭޝަނުން ބުނީ ދިވެހިންނަށް ފަސޭހަކަމާއިއެކު "ސީމްލެސް ޓްރެވެލް" ޚިދުމަތް ފޯރުކޮށްދިނުމަށް އީ-ގޭޓް ގެ ޚިދުމަތް އަލުން ފަށާފައިވާ ކަމަށެވެ. މި ޚިދުމަތް މެދު ކަނޑާލާފައިވަނީ ކޮވިޑް-19 އާއި އެކު އެވެ. އިމިގްރޭޝަނުން ބުނީ އީ-ގޭޓް ޚިދުމަތް ފެށުމާއެކު ދިވެހި ދަތުރުވެރިންނަށް އިމިގްރޭޝަން ކްލިއަރެންސް އަމިއްލައަށް ހެދި ލުއިފަސޭހަ ވެގެންދާނެ ކަމަށެވެ.
ދިވެހިންނަށް ފަސޭހަކަމާއެކު 'ސީމްލެސް ޓްރެވަލް' ގެ ޚިދުމަތް ފޯރުކޮށްދިނުމުގެ ގޮތުން 'އީ-ގޭޓް' ގެ ޚިދުމަތް އަލުން ފެށުން. pic.twitter.com/uktCR0xMmm
— Maldives Immigration (@ImmigrationMV) November 27, 2023
'އީ-ގޭޓް' ބޭނުން އަކީ ވަރަށް ފަސޭހައި ބޭނުން ކުރެވޭ ޙިދުމަތެކެވެ. އެގޮތުން ޚިދުމަތް ބޭނުން ކުރަން ފުރަތަމަ ބޯޑިން ޕާހުގައިވާ ބާކޯޑު ސްކޭނަރގައި ޖައްސާ ރީޑުކުރުމުން، ދެން ޕާސްޕޯޓުގެ ބަޔޯޑާޓާ ޕޭޖް ސްކޭނަރގައި ޖައްސާ ރީޑްކޮށްލާނީއެވެ. އަދި ޕާސްޕޯޓާއި ހަވާލުވި ވަގުތު ވެރިފިކޭޝަނަށް ނަގާފައިވާ އިނގިލި ފިންގަރޕްރިންޓް ރީޑަރުގައި ޖެއްސުމުން ގޭޓު ހުޅުވޭނެއެވެ. 'އީ-ގޭޓް'ގެ ޚިދުމަތް ވެލާނާ އިންޓަރނޭޝަނަލް އެއަރޕޯޓުގެ އެރައިވަލް އަދި ޑިޕާޗަރ ހޯލުގައިވެސް ބޭނުންކުރެވޭނެ ކަމަށް އިމިގްރޭޝަނުން ވަނީ ބުނެފައެވެ.
އީގޭޓް ޚިދުމަތް ފަށާފައިވާއިރު ރައީސް ޑރ. މުއިއްޒުގެ ވިސްނުންފުޅާއި އެއްގޮތަށް ދިވެހިންނަށް ދަތުރުފަތުރު ކުރުމުގައި ލުއި ގޮތްތަކެއް ހަމަޖެއްސުމަށް ދަނީ މަސައްކަތް ކުރަމުންނެވެ. އެގޮތުން، މަޤާމާއި އަލަށް ހަވާލުވުމަށް ފަހު އިމިގްރޭޝަން ކޮންޓްރާލަރ މުހައްމަދު ޝަމްހާން ވަހީދު ވަނީ ރާއްޖެއަށް އަންނަ ފަރާތްތަކާއި ފުރާ ފަރާތްތަކުން ފުރިހަމަ ކުރަން ޖެހޭ ޓްރެވެލް ޑެކްލެރޭޝަން ފޯމު އުވާލާފައެވެ.