އައްޑޫ މަގު ހެދުމުގެ މަޝްރޫޢުގެ މިހާރުވެފައިވާ އެއްބަސްވުމުގެ އިތުރަށް މަސައްކަތް ކުރުމަށް، އެއްވެސް އެއްބަސްވުމެއް ނެތް ކަމަށް ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓްރީން ހާމަކޮށްފިއެވެ.
އައްޑޫ މަގު ހެދުމުގެ މަޝްރޫޢު އަކީ ދެ ކުންފުންޏަކާއި ހަވާލުކޮށްގެން ކުރިއަށް ގެންދާ މަޝްރޫޢުއެކެވެ. އެންމެ ބޮޑު މަސައްކަތެއް ކުރަނީ އިންޑިއާގެ އެފްކޮންސް ކުންފުންޏާއި ހަވާލުކޮށްގެންނެވެ. މިމަޝްރޫޢު ފުރަތަމަ ހަވާލު ކުރެވުނީ، 103 ކިލޯމީޓަރު މަގު ހަދައި ފެން ހިންދާ ނިޒާމު ޤާއިމްކޮށް ސީސީޓީވީ ނިޒާމަކާއި މަގުބައްތި ހަރުކޮށް ނިންމާ ގޮތަށެވެ. މީގެ ތެރެއިން 40 ކިލޯމީޓަރު މަގު ތާރު އަޅައިގެން ހަދަން ނިންމާފައިވާއިރު، އަދި ބާކީ 60 ކިލޯމީޓަރު ސީޓީބީ ނުވަތަ ސިމެންތި ޓްރީޓެޑް ބޭސް ލޭޔަރ އެއް އަޅައިގެންނެވެ.
މި މަޝްރޫޢު އާއި ގުޅޭގޮތުން "އައްޑޫލައިވް" ވަނީ ކޮންސްޓަރަކްޝަން އެންޑް އިންފްރާސްޓަރަކްޗަރ މިނިސްޓަރ ޑރ. އަބްދުﷲ މުއްތަލިބު އާއި ސުވާލުކޮށްފައެވެ. މިނިސްޓަރ ވިދާޅުވި ގޮތުގައި މަގު ހެދުމުގެ މަޝްރޫޢުގެ ތެރެއިން ސިމެންތި އަޅައިގެން މަގު ހަދަން ނިންމާފައިވީނަމަވެސް އެއީ އެންމެ ރަނގަޅު ގޮތް ކަމަށް ދެކެވަޑައި ނުގަންނަވާ ކަަމަށެވެ.
" އަޅުގަނޑުމެން ނުދެކެން އެއީ އެންމެ ރަނގަޅު ގޮތެއް ކަމަށް އެކަން ކުރަން. މިހާރު މިނިސްޓްރީން މިދަނީ މިމަސައްކަތުގެ ކޮންސަލްޓެންޓާއި މަޝްވަރާކޮށްގެން އެކަމަށް ސޮލިއުޝަނެއް ހޯދަން މަސައްކަތް ކުރަމުން " މިނިސްޓަރ ވިދާޅުވިއެވެ.
ކުރީ ސަރުކާރުގެ ޕްލޭނިންގް މިނިސްޓްރީގެ ސްޓޭޓް މިނިސްޓަރ އަދި ކުރީގެ މޭޔަރ އަބްދުﷲ ސޯދިޤް މިދިޔަ ސެޕްޓެމްބަރު މަހު އައްޑޫލައިވްއަށް ވިދާޅުވީ، މިމަސައްކަތުގެ ދެވަނަ ފިޔަވަހި އޮތީ ޓެންޑަރ މަރުހަލާގައި ކަމަށެވެ. ނަމަވެސް މިނިސްޓަރ ޑރ. މުއްތަލިބު ވިދާޅުވީ އެއްވެސް އެއްބަސްވުމެއް އެކަމުގައި ނެތް ކަމަށާއި، އަދި ޓެންޑަރ މަރުހަލާގައިވެސް ނެތް ކަމަށެވެ.
އޭރު ސީޓީބީ އަޅައިގެން ގިނަ މަގުތަކެއް ހެދުމަށް ނިންމުން ގިނަ ރައްޔިތުން ވަނީ ކަންބޮޑުވުން ފާޅުކޮށްފައެވެ. އެކަންބޮޑުވުންތަކާއި އެކު އޭރު ސަރުކާރުން ނިންމީ ހުރިހާ މަގެއްވެސް ހާދާނީ ތާރު ނުވަތަ ގައު-އަޅައިގެން ކަމަށެވެ. އެގޮތަށް ނިންމާ ގިނަ ގިނަ މަގުތަކުގައި ގައު ވެސް ވަނީ އަޅާފައެވެ. އަދި މިހާރު ކުރިއަށްދާ މަޝްރޫޢުގެ ތެރޭގައި ނުހިމެނޭ ގިނަ މަގުތަކެއް ހުރިއިރު، އެ މަގުތަކުގެ މަސައްކަތް ކުރަން ނިންމީ ދެވަނަ ފިޔަވަހީގެ ދަށުންނެވެ.
އެހެން ނަމަވެސް ދެވަނަ ފިޔަވަހީގެ އެއްވެސް އެގްރިމެންޓެއް ނެތުމާއެކު، އެ މަސައްކަތް ކުރިއަށް ގެންދާނެ ގޮތަކާއި މެދު ގޮތެއް ނިންމަން ޖެހިފައިވަނީ މި ސަރުކާރަށެވެ. މިނިސްޓަރ މުއްތަލިބް ވަނީ މަސައްކަތުގެ ކޮންސަލްޓެންޓް އެލެއެންޓީއާއި އެކު މަޝްވަރާކޮށްގެން ސޮލިއުޝަނެއް ހޯއްދަވާނެ ކަމުގެ ޔަޤީންކަން ދެއްވާފައެވެ.
މި ސަރުކާރު ހަވާލުވިއިރުވެސް މަސައްކަތް ކުރިއަށްދާއިރު، އިންފްރާސްޓްރަކްޗަރ މިނިސްޓްރީން ވަނީ ޖީކޭޑީއާއި ހަވާލުކޮށްގެން ކުރިއަށް ގެންދާ އައްޑޫ މަގު ހެދުމުގެ މަޝްރޫޢު ޖެނުއަރީއަށް ނިމޭނެ ކަމަށް މިނިސްޓްރީއަށް އެނގިފައިވާ ކަމަށް ވިދާޅުވެފައެވެ. އަދި އެ މަސައްކަތްވެސް މަޑު ނުޖެހި ކުރިއަށްދާކަން މިނިސްޓްރީން ފާހަގަ ކުރެއެވެ.