އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބުގައި ވާދަނުކުރައްވާނެ ކަމަށް މައްޗަންގޯޅި މެދު ދާއިރާގެ މެންބަރު މުހައްމަދު ނަޝީދު ވިދާޅުވެއްޖެ އެވެ.
މި ދައުރުގެ ތެރޭގައި މަޖިލީހުގެ ރައީސްކަމާއި ރާއްޖޭގެ ރައީސްކަން ވެސް ކުރިން ކުރައްވާފައިވާ ނަޝީދު މަޖިލިހުގެ މެންބަރުން ތިއްބަވާ ވަަޓްސްއެޕް ގްރޫޕަކަށް ފޮނުއްވި މެސެޖެއްގައި ވިދާޅުވީ އަންނަ އަހަރު ބާއްވާ މަޖިލިސް އިންތިހާބުގައި އެމަ ނިކުފާނު ވާދަ ނުކުރައްވާނެ ކަމަށެވެ.
"އަޅުގަނޑު ދެން އަންނަ އިންތިހާބަކަށް ކުރިމަތިނުލާނެ. އަޅުގަނޑުގެ އެހެން މަސައްކަތް ވަރަށް ގިނަ. އެކަމު ރާއްޖޭގައި ގިނައިން އުޅޭނީ." ނަޝީދު ވިދާޅުވި އެެވެ.
ނަޝީދަކީ ރާއްޖޭގެ ރައީސްކަން ކުރެއްވުމުގެ ކުރިން ވެސް މަޖިލީހުގެ މެންބަރުކަން ކުރެއްވި ބޭފުޅެކެވެ.
ނަޝީދު މަޖީލިހުގެ މި ދައުރަށް އިންތިހާބުވެވަޑައިގެންނެވީ އެ މަނިކުފާނު ވެސް އިސްކޮށް ހުންނަވައިގެން އެމްޑީޕީގެ ޓިކެޓްގަ އެވެ. ނަމަވެސް އެ ޕާޓީން މި އަހަރު ވަކިވެވަޑައިގެން. ނަޝީދު ވަނީ އާ ޕާޓީއެއް ވެސް އުފައްދަވައިފަ އެވެ. އެއީ މި އަހަރުގެ ރިޔާސީ އިންތިހާބަށް ކެންޑޭޓަކު ވެސް ނެރުނު ދަ ޑިމޮކްރެޓްސް އެވެ.
ނަޝީދު މަޖިލީހުގެ ރައީސްކަމުން އިސްތިއުފާ ދެއްވީ އެ މަނިކުފާނުގެ މައްޗަށް އެމްޑީޕީން އިތުބާރު ނެތްކަމުގެ ވޯޓެއް ނަގަން މަސައްކަތް ކުރަމުން ދަނިކޮށެވެ. ނަޝީދަކީ 2008 ގައި ވެރިކަމަށް ވަޑައިގެން ދައުރުގެ މެދުތެރެއިން 2012 ގައި ރައީސްކަމުން ވެސް އިސްތިއުފާ ދެއްވި ބޭފުޅެކެވެ.