ކުރީގެ ޓުއަރިޒަމް މިނިސްޓަރ އަލީ ވަހީދުގެ ކިބައިން އިނގިރޭސި ސަރުކާރުން މަޢާފަށް އެދި އޭނާއަށް ބަދަލު ދޭން ނިންމާފައިވާ ކަމަށް އޭނާ ތަމްސީލު ކުރައްވާ އެޑްވޮކޭޓަސް ލޯ ފާމުން ހާމަކޮށްފިއެވެ.
އަލީ ވަހީދު 2021 ވަނަ އަހަރު އިނގިރޭސި ވިލާތުގައި ހުންނަވަނިކޮށް އިނގިރޭސި އިމިގްރޭޝަން ޤާނޫނާއި ހިލާފުވެފައިވާ ކަމަށް ބުނެ، ވަނީ ހައްޔަރުކޮށްފައެވެ. އަދި އެފަހަރު އޭނާ ވަގުތީ ގޮތުން ބަނދުގައި ބެހެއްޓުމަށް ފަހު ވަނީ ދޫކޮށްލާފައެވެ. މި މައްސަލާގައި އޭނާ ތަމްސީލު ކުރުމަށް އެޑްވޮކޭޓަސް ލޯ ފާމާއި އަދި އިނގިރޭސިވިލާތުގެ ވަކީލުންގެ ޓީމެއް ގުޅިގެން މަސައްކަތް ފެށި ކަމަށް އެފާމުން ބުނެއެވެ.
އެ ލޯފާމުން ވަނީ އަލީ ވަހީދުގެ ފަރާތުން ޤާނޫނާއި ޚީލާފު ނުވާކަމުގެ ހެކިތައް ލިބުމާއެކު އޭނާ މިނިވަން ކުރުމުގެ މަސައްކަތް ފަށައި، ގުޅިފައިވާ ވަކީލުންގެ ޓީމުގެ މަސައްކަތުން ވަރަށް އަވަހަށް މިނިވަންވި ކަމަށް ބުނިއެވެ. މިމައްސަލާގައި އޭނާ ބަނދުގައި ބެހެއްޓީ އެއްވެސް އަސާސެއް ނެތް އިނގިރޭސި ޤާނޫނާއި ހިލާފަށް ކަން މިއަދު ހާމަވެފައިވާ ކަމަށް އެ ލޯފާމުން ބުނެއެވެ. މިމައްސަލާގައި އިނގިރޭސި ސަރުކާރާއި ދެކޮޅަށް ދައުވާ ކުރުމުގެ ކުރިން އެ ވަކީލުންގެ ޓީމުން ސަރުކާރާއި އެކު ކުރެވުނު މަޝްވަރާތަކުން އެ ހައްޔަރަކީ ޤާނޫނާއި ޚިލާފު ހައްޔަރެއް ކަަމަށް އެ ޤައުމުގެ ކަމާއި ބެހޭ ފަރާތްތަކުން އެއްބަސްވެފައިވާ ވަކީލުންގެ ޓީމުން ބުނެއެވެ.
މިއާއެކު، އިނގިރޭސި ސަރުކާރުން ވަނީ އަލީ ވަހީދުގެ ކިބައިން މަޢާފަށް އެދިފައި ކަމަށް އެ ވަކީލުން ހާމަކުރެއެވެ. އަދި މިކަމުގެ ސަބަބުން ލިބުނު ގެއްލުުމުގެ ބަދަލު ދިނުމަށް އިނގިރޭސި ސަރުކާރުން އެއްބަސްވެފައިވާ ކަމަށް އޭނާ ބުނިއެވެ. އިނގިރޭސި ސަރުކާރުން އަލީ ވާހީދަށް ބަދަލުގެ ގޮތުގައި 20،000 ސްޓާލިންގް ޕައުންޑް ނުވަތަ ގާތްގަނޑަކަށް 25،000 އެމެރިކާ ޑޮލަރު ދިނުމަށް ވަނީ އެއްބަސްވެފައި ކަމަށް އެ ފަރާތުން ބުނެއެވެ.
އަލީ ވަހީދު އިނގިރޭސި ވިލާތަށް ފުރާފައިވަނީ ބޭސްފަރުވާ ކުރުމަށް ކަމަށް ބުނެއެވެ. އޭރު އޭނާގެ މައްޗަށް ދައުލަތުން ވަނީ ޖިންސީ ކުށުގެ ދައުވާ ކޮށްފައެވެ. މި ދައުވާތަކަށް އޭނާ އިންކާރު ކުރި ނަމަވެސް، އެންމެ ފަހުން އޭނާ މައްޗަށް އިތުރަށް ދައުވާ ކުރިއަށް ނުގެންގޮސް އަނބުރާ މައްސަލަ ދައުލަތު ވަނީ ނަގާފައެވެ. އެއާއެކު އޭނާ މިނިވަން ވެފައިވާއިރު، މައްސަލައަށް ފަހު އޭނާ ވަނީ މިއަހަރު ޖުލައި މަހު މާލެ އަނބުރާ އައިސްފައެވެ.