މާލޭގައި ހިނގި މާރާމާރީއަކާއި ގުޅިގެން 3 މީހެއް ފުލުހުން ބެލުމުގެ ދަށަށް ގެންގޮސްފައިވާ ކަމަށް ފުލުހުން ހާމަކޮށްފިއެވެ.
މި މާރާމާރީ ހިންގާފައިވަނީ ހެންވޭރު ޗީބޯ ކެފޭ ކައިރީގައެވެ. މީސްމީޑިއާގައި ބައެއް މީހުން ބުނާގޮތުން މި މާރާމާރީ ހިންގާފައިވަނީ މާލޭގެ ދެ "ގޭންގެއް" ގެ މެދުގައެވެ.
ފުލުހުން ބުނީ މާރާމާރީއެއް ހިންގިކަމުގެ ރިޕޯޓު ލިބިފައި ވަނީ މިއަދު ހަވީރު ފަހެއް ޖަހައި އެހައިކަށްހާއިރު ކަމަށެވެ. މި މައްސަލާގައި 3 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. އެއީ، 18 އަހަރުގެ މީހަކާއި 22 އަހަރުގެ މީހަކާއި 24 އަހަރުގެ މީހެކެވެ.
މި މާރަމާރި ހިނގި ވަގުތުގެ ވީޑިއޯއެއް ސޯޝަލް މީޑިއާގައި ވަނީ އާންމުވެފައެވެ. ސޯޝަލް މީޑިއާގައި ދައުރުވި ވީޑިއޯއަކުން ފެންނަ ގޮތުގައި، މާރަމާރީ ހިނގި ވަގުތު އެ ސަރަހައްދުގައި ފުލުހުންނާއި އާންމުންގެ ގިނަ ބަޔަކު އެއްވެފައި ތިބިއެވެ.
މި މާރާމާރީގެ މައްސަލަ ފުލުހުން އަންނަނީ އިތުރަށް ތަހުގީގުކުރަމުންނެވެ.
ބުދަ ދުވަހުގެ ހަވީރު އެތައް ބައެއްގެ ކުރިމަތީގައި ރޯމާ ދުވާލު މާރާމާރީއެއް ހިންގާފައިވާއިރު، އަންގާރަ ދުވަހުގެރޭ ފުލުހަކަށް ވެސް ހަމަލާދީފައިވެއެވެ. އެގޮތުން މަސްތުވާތަކެތި ގެންގުޅުނުކަމަށް ޝައްކުކުރެވުނު މީހަކު ހިފަހައްޓަން ފުލުހަކު އުޅުމުގެ ތެރޭގައި އޭނާ އަށް ވަނީ ހަމާލާދީފައެވެ. މިމައްސަލާގައި ހަމަލާދިން މީހާ ވަނީ ހައްޔަރުކޮށްފައެވެ.