ބޮލީވުޑްގެ މަޝްހޫރު އެކްޓަރު ސަލްމާން ހާނަށް ނިސްބަތްކޮށް، އޭނާ އަށް ހާއްސަ ކެއުންތަކާ އެކު "ބައިޖާންޒް" ގެ ނަމުގައި ސަޕޯޓަރުންތަކެއް މުމްބާއީގައި ރެސްޓޯރެންޓެއް ހުޅުވައިފި އެވެ.
"ބާއީ" އަކީ އާންމުކޮށް ސަލްމާނަށް އޭނާގެ ސަޕޯޓަރުން ކިޔައި އުޅޭ ނަމެކެވެ. "ބައިޖާންޒް" ގެ ނަމުގައި ރެސްޓޯރެންޓް ހުޅުވީ މުމްބާއީގައި ސަލްމާން ދިރިއުޅޭ ބަންޑްރާ ސަރަހައްދުގަ އެވެ.
އޭނާގެ ނަމާ ގުޅުވައިގެން ހުޅުވި ރެސްޓޯރެންޓްގެ އެތެރޭގެ އިންޓީރިއާ ހަދާފައި ވަނީ ސަލްމާންގެ ފޮޓޯތަކާއި ކުރެހުންތަކާއި އޭނާގެ ހުރިހާ ފިލްމެއް ރިލީޒްވި ތާރީހުތައް ފާރުތަކުގައި ލިޔެގެންނެވެ. އަދި ސަލްމާންގެ ފިލްމުތަކުގައި ހިމެނޭ މަޝްހޫރު ބައެއް ޑައިކޮލްގްތައް ވެސް ފާރުތަކުން ފެންނަން ހުންނާނެ އެވެ.
މި ރެސްޓޯރެންޓް ހުޅުވުމުގައި އިސްކޮށް ހަރަކާތްތެރިވި ސަލްމާންގެ ފޭނުން ބުނީ މިއީ ހަމަ އޭނާ އަށް ތާއީދު ކުރާކަން ދެއްކުމުގެ ގޮތުން ތަފާތު ކަމެއް ކޮށްލުމުގެ ގޮތުން ކުރި ކަމެއް ކަމަށެވެ. އަދި އެ ރެސްޓޯރެންޓްގެ ކެއުންތަކަށް ނަން ވެސް ދީފައި ހުންނާނީ ސަލްމާނާ ކޮންމެވެސް ގޮތަކަށް ގުޅުވާލައިފައި ކަމަށް އެ މީހުން ބުންޏެވެ.
"ބައިޖާންޒް" ހުޅުވި ޓީމުން ބުނީ އެ މީހުންގެ އުންމީދަކީ އެ ރެސްޓޯރެންޓަށް ކޮންމެވެސް ދުވަހަކުން ސަލްމާން ޒިޔާރަތްކޮށްލުން ކަމަށެވެ. އަދި އެއީ ލިބޭނެ ވަރަށް ބޮޑު ޝަރަފެއް ކަަމަށެވެ.