އައްޑޫ ހިތަދޫގައި ކުށް މަދުކުރުމާ ގުޅޭ ގޮތުން ކައުންސިލާއި ހިތަދޫ ޕޮލިސް ސްޓޭޝަނުން މަޝްވަރާކޮށްފި އެވެ.
އިއްޔެ ކައުންސިލް އިރާގައި އޮތް އެ މަޝްވަރާ ބައްދަލުވުމުގައި ހިތަދޫ ޕޮލިސް ސްޓޭޝަންގެ ވެރިން ބައިވެރިވަޑައިގަތް އިރު، ކައުންސިލްގެ ފަރާތުން ބައްދަލުވުމުގައި އިސްކޮށް ހުންނެވީ ޑެޕިއުޓީ މޭޔަރު މުހައްމަދު ޝުއާއު އެވެ.
އެ ބައްދަލުވުމާ ގުޅޭ ގޮތުން ކައުންސިލުން ބުނީ މިއި ހިތަދޫގައި މި ފަހުން އިތުރުވެފައިވާ މާރާމާރީ، ވައްކަން އަދި އެހެނިހެން މައްސަލަތަކާއި އެ މައްސަލަތަކަށް ހައްލު ހޯދުމާ ގުޅޭ ގޮތުން ބޭއްވި މަޝްވަރާ ބައްދަލުވުމެއް ކަމަށެވެ.
އައްޑޫގައި އެންމެ ގިނައީ ވައްކަމާއި މަސްތުވާތަކެތީގެ މައްސަލަތަކެވެ. އަދި ގިނަ ކުށްތަކުގެ އަސްލު ގުޅިފައި ވަނީ މަސްތުވާތަކެއްޗާ ކަމަށް ގިނަ ބަޔަކު ގަބޫލުކުރެ އެވެ.
އައްޑޫގައި ފުލުހުން ކުށް މަދުކުރަން ކުރާ މަސައްކަތުގެ ތެރޭގައި އަވައްޓެރި ފުލުހުންގެ ހިދުމަތް ވެސް ފާހަގަކޮށްލެވެ އެވެ. އަދި އައްޑޫގައި ފުލުހުންގެ ތިން ސްޓޭޝަން ހުރެ އެވެ. އެއީ ހިތަދު އާއި ގަމުގެ އިތުރުން ހުޅުމީދޫގަ އެވެ.