އެމްޓީސީސީގެ މެނޭޖިން ޑިރެކްޓަރުކަން އެންމެ ފަހުން އަދާކުރެއްވި އާދަމް އާޒިމް މާލޭގެ މޭޔަރު ވާދަކުރައްވަން ނިންމާފައިވާ ކަމަށް އެނގިއްޖެ އެވެ.
މިކަން އަދި ރަސްމީކޮށް އިއުލާން ނުކުރި ނަމަވެސް އޭނަ އެ މަގާމަށް ގެންނަން ސޯޝަލް މިޑިއާގައި އެކި ފަރާތްތަކުން މިހާރު އަންނަނީ އާޒިމަށް ތާއީދު އޮތްކަން ވެސް ހާމަކުރަމުންނެވެ. މީގެ ތެރޭގައި ކުރީގެ ޑިފެންސް މިނިސްޓަރު މާރިޔާ އަހުމަދުދީދީ ވެސް ހިމެނިވަޑައިގަނެ އެވެ.
މާރިއާ ސޯޝަލް މީޑިއާ ޕޯސްޓެއްގައި ވިދާޅުވީ އެމްޑީޕީގެ ފަރާތުން މާލޭގެ މޭޔަރު ކަމަށް އާޒިމް ވާދަކުރައްވަން ތާއީދުކުރައްވާ ކަމަށާއި އޭނަ އަކީ އެ މަގާމަށް ވަރަށް އެކަށީގެންވާ ބޭފުޅެއް ކަމަށެވެ.
I understand @adamazim is putting his name to stand as the MDP Candidate for Male’ City Mayor. I believe he is most suited for the post and I fully endorse him. He is a “can do” man with a positive attitude. I look forward to working in his Campaign and wish him all the best!
— Mariya Didi 🎈 (@MariyaDidi) November 29, 2023
އާޒިމަކީ މިހާރު ދަނގެތީ ދާއިރާގެ މަޖިލިސް މެންބަރުގެ މަގާމުގައި ހުންނެވި މޯލްޑިވްސް ނެޝަނަލް ޕާޓީ (އެމްއެންޕީ) ގެ ރައީސް އަދި ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމްގެ ކޮއްކޮ އެވެ. އާޒިމަކީ ކުންފުނިތަކުގެ އިސް މަގާމުތަކެއް ފުރުއްވާފައި ބޭފުޅެކެވެ. އެގޮތުން އެސްޓީއޯ އާއި އެމްޑަބްލިއުއެސްސީގެ އެމްޑީކަން ވެސް ކުރައްވާފައިވެ އެވެ.
މާލޭގެ މޭޔަރު ހޮވަން ބާއްވާ ބައި-އިލެކްޝަން އޮންނާނީ ޖެނުއަރީ މަހުގެ 13 ގަ އެވެ.
މާލޭގެ މޭޔަރު ކަމަށް ވާދަކުރައްވަން ނިންމަވާފައިވާ ބޭފުޅުންގެ ތެރޭގައި ރައީސް އިބްރާހީމް މުހައްމަދު ސޯލިހުގެ ސަރުކާރުގެ ޔޫތު މިނިސްޓަރު އަހުމަދު މަހުލޫފާއި ކުރީގެ އެޓާނީ ޖެނެރަލް އާޒިމާ ޝަކޫރާއި ކުރީގެ ޕޮލިސް ކޮމިޝަނަރު ހުސައިން ވަހީދުގެ އިތުރުން މާލެ ސިޓީ ކައުންސިލްގެ މެންބަރެއްގެ ގޮތުގައި ހުންނެވި ސައިފު ފާތިހު ހިމެނެ އެވެ. ސައިފަކީ ދަ ޑިމޮކްރެޓްސް އިން ވާދަކުރައްވާ ކެންޑިޑޭޓެވެ.
މާލޭގެ މޭޔަރުކަމުގެ މަގާމު ހުސްވީ އެ މަގާމުގައި ހުންނެވި ޑރ. މުހައްމަދު މުއިއްޒު ރިޔާސީ އިންތިހާބުގައި ވާދަކުރައްވައި ކާމިޔާބު ކުރެއްވުމާ ގުޅިގެންނެވެ. އެ މަނިކުފާނު ރައީސްކަމުގެ ހުވާކުރެއްވީ މި މަހުގެ 17 ގަ އެވެ.