އައްޑޫ ހިތަދޫ ސްކޫލުން ބެލެނިވެރިންގެ މަހާސިންތާއެއް ބާއްވަން ނިންމައިފި އެވެ.
އެ ސްކޫލްގެ ޕޭރަންޓް ޓީޗާ އެސޯސިއޭޝަން (ޕީޓީއޭ) އިން އިންތިޒާމުކުރާ މި މަހާސިންތާ އޮންނާނީ އަންނަ ހޮނިހިރު ދުވަހު އެވެ. އަދި މިއީ ހިތަދޫ ސްކޫލުން ބާއްވާ މިފަދަ ފުރަތަމަ މަހާސިންތާ އެވެ.
މި މަހާސިންތާ ބާއްވަނީ "އުނގެނުމާއި އުނގަންނައި ދިނުމުގައި ބެލެނިވެރިންގެ ހިއްސާ: ދަރިވަރުންގެ ކުރިއެރުން" މި ޝިޔާރުގެ ދަށުންނެވެ. އަދި މި މަހާސިންތާ ހާއްސަކޮށްފައި ވަނީ ޕީޓީއޭގެ މަންދޫބުންގެ އިތުރުން ކީ-ސްޓޭޖް ދޭއްގެ ބެލެނިވެރިންގެ ތެރެއިން އެކަމަށް އެދޭ ބެލެނިވެރިންނަށެވެ.
ދަރިވަރުންގެ ގާބިލިއްޔަތުތައް އިތުރުކުރުމަށްޓަކައި ބެލެނިވެރިންނަށް ކުރެވިދާނެ ކަންތައްތަކާއި ސްކޫލްގެ ޕޮލިސީތަކަށް ބެލެނިވެރިން އަހުލުވެރިކުރުވުމާއި ދަރިވަރުންގެ އުނގެނުމުގައި ބެލެނިވެރިންގެ ދައުރާ ގުޅޭ ގޮތުން މި މަހާސިންތާގައި މަޝްވަރާ ކުރާނެ އެވެ. އެގޮތުން މަހާސިންތާގައި 100 އެއްގާ ބެލެނިވެރިން ބައިވެރިވާނެ އެވެ.
ހިތަދޫ ސްކޫލުގްގެ މެނޭޖްމަންޓުން ބުނީ ސްކޫލް ހިންގުމުގައި ބެލެނިވެރިންގެ ދައުރު ވަރަށް މުހިންމު ދައުރެއް އަދާކުރާ އިރު، ވީހާ ވެސް ފުޅާ ގޮތެއްގައި ބެލެނިވެރިންނަށް ދައުރު މުހިއްމުވާ ކަމަށެވެ. އެގޮތުން އެޑިޔުކޭޝަން މިނިސްޓްރީން އެކުލަވާލައިވާ ޕޮލިސީތަކުގެ އިތުރުން އެ ސްކޫލްގެ ޕޮލިސީތައް ބެލެނިވެރިންނަށް ވަރަށް ބޮޑަށް އަހުލުވެރިވާން ޖެހޭ ކަމަށް ބުންޏެވެ.
އެހެންވެ އަލަށް ޕީޓީއޭ އިން ބާއްވާ މަހާސިންތާ އަކީ އެކަމަށް ފަހިވާ މުހިއްމު ފުރުސަތެއް ކަމަށް ވިދާޅުވި ހިތަދޫ ސްކޫލުން ބުންޏެވެ.
އެ ސްކޫލުން ވަނީ ކީ-ސްޓޭޖް 3 އަށް ވެސް ހާއްސަކޮށްގެން މަހާސިންތާއެއް ބާއްވަން ނިންމައިފަ އެވެ. އަދި އަހަރަކު މަދުވެގެން ބެލެނިވެރިންގެ ދެ މަހާސިންތާ ބާއްވަން މަސައްކަތްކުރާނެ ކަމަށް ގްރޭޑް 10 އާ ހަމައަށް ކިޔަވައިދޭ ސްކޫލުން ބުންޏެވެ.