ބޭރު ޤައުމުތަކުގައި ޤާއިމްވެފައިވާ ދިވެހި ރާއްޖޭގެ އެމްބަސީތަކުން ނުވަތަ ސަފާރާތަކުން އެންމެ އިސްކަމެއް ދޭން ޖެހެނީ ދިވެހިންނަށް ކަމުގައި ރައިސުލްޖުމުހޫއްރީއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، މިވަގުތު ކޮޕް ސަމިޓަށް އެކުވެރި އަރަބި އިމާރާތައް ކުރައްވަމުން ގެންދަވާ ދަތުރުފުޅުގެ ތެރެއިން އެ ޤައުމުގައި ދިރިއުޅެމުންދާ ދިވެހިންނާއެކު ބޭއްވި ބައްދަލުވުމެއްގައި ވާހަކަަ ދައްކަވަމުންނެވެ. މި ބައްދަލުވުމުގައި ރައީސް ވަނީ ޔޫއޭއީގައި ދިރިއުޅެމުންދާ ދިވެހިންގެ ހާލުއަހުވާލު ބައްލަވައި، އަދި އެ ފަރާތްތަކުން ހުރި ކަންބޮޑުވުންތަކާއި ޝުޢޫރުތައް އަޑުއައްސަވާފައެވެ.
ބޭރު ޤައުމުތަކުގައި ހުންނަ ދިވެހި ސަފާރާތަކުން އެންމެ އިސްކަން ދޭންޖެހޭނީ އެ ޤައުމުތަކަށް ޒިޔާރަތްކުރާ އަދި އެ ޤައުމުތަކުގައި ދިރިއުޅޭ ދިވެހީންގެ ހާލުއަހުވާލު ބަލައި ކަންކަން ފަހިކޮށް ދިނުމަށް ކަމުގައި ރައީސުލްޖުމްހޫރިއްޔާ ވިދާޅުވެއްޖެ. pic.twitter.com/UJaTwrkZpQ
— The President's Office (@presidencymv) November 30, 2023
ބައްދަލުވުމުގައި ވާހަކަ ދައްކަވަމުން ރައީސް ވަނީ، ބޭރު ޤައުމުތަކުގައި ޤާއިމްވެފައި ތިބި ސަފާރާތައް ނުވަތަ އެމްބަސީތަކުން އެންމެ އިސްކަމެއް ދޭން ޖެހެނީ، އެ ޤައުމުތަކަށް ޒިޔާރަތްކުރާ އަދި އެ ޤައުމުތަކުގައި ދިރިއުޅޭ ދިވެހީންގެ ހާލުއަހުވާލު ބަލައި ކަންކަން ފަހިކޮށް ދިނުމަށް ކަމުގައި ވިދާޅުވެފައެވެ. މީގެ އިތުރުން ރާއްޖެއިން ބޭރަށް ކުރައްވާ ކޮންމެ ޒިޔާރަތެއްގައިވެސް ވަގުތު ލިބިވަޑައިގަތް ވަރަކުން ދިވެހީންނާ ބައްދަލުކުރައްވާ ހާލުއަހުވާލު ބައްލަވައި ސަރުކާރުން ފަހިކޮށްދެވޭނެ ކަންކަމާމެދު މަޝްވަރާކުރައްވާނޭކަމުގައި ރައީސް ވިދާޅުވިއެވެ.
މި ބައްދަލުވުމުގައި ރައީސް ވަނީ ރާއްޖެއިން ބޭރުގައި ދިރިއުޅޭ ދިވެހި ކިޔަވާ ކުދީންނާ ދިވެހީނަށް އިސްލާމް ދީނާ ދިވެހިބަހާ ދިވެހި ޤައުމިއްޔަތު އުނގަންނައިދެވޭނެ އިންތިޒާމް ދިވެހި ސަފާރާތައް މެދުވެރިކޮށް ހަމަޖައްސަވައިދެއްވާނެ ކަމަށް ވިދާޅުވެފައެވެ.
މި ބައްދަލުވުމުގައި ޔޫއޭއީގައި ދިރިއުޅެމުންދާ ދިވެހި އާއިލާތަކާއި އަދި އެ ޤައުމުގައި މަތީ ތަޢުލީމު ހާސިލް ކުރަމުންދާ ދިވެހި ކުދިންނާއެކު 200 އެއްހައި މީހުން ވަނީ ބައިވެރިވެފައެވެ.