މިހާރުގެ ފިޝަރީޒް މިނިސްޓަރު އަހުމަދު ޝިޔާމަށް އެޑްރެސްކޮށް މަސްވެރިޔަކު އޭނަގެ ހާލަތު ބަޔާންކޮށް ސޯޝަލް މީޑިއާގައި އާންމުކުރި ސިޓީއަކާ ގުޅިގެން މިނިސްޓަރު މަސްވެރިޔާ އަށް ގުޅައި ކަންބޮޑުވުންތައް އައްސަވައިފި އެވެ.
އެ ސިޓީގައި މަސްވެރިޔާ ބުނެފައި ވަނީ، "އަޅުގަނޑުމެން މަސްވެރިން މިހާރު ތިބެނީ އަނގަޔާ އަތާ ދިމާނުވެ" ކަމަށާއި "ކުދިންގެ ޓީއުޝަން ފީ، އަދި އިންޓަވަލް، ގުރުއާން ކްލާސްތަކުގެ ފީ ނުދެއްކިފައި" ކަމަށެވެ.
މީގެ އިތުރުން ގޭގެ ކަރަންޓް ބިލާއި ފޯނު ނުދެއްކިފައި ވެސް ތިބެން ޖެހިފައިވާ ކަމަށް މަސްވެރިޔާ ބުންޏެވެ. ނަމަވެސް މިނިސްޓަރަކީ ދައުލަތުގެ ހަޒާނާއިން ހުރިހާ އިނާޔާތްތަކެއް ލިބިވަޑައިގަންނަވާ ބޭފުޅެއް ކަމަށް ސިޓީގައި ފާހަގަކޮށްފައިވެ އެވެ.
އެކުވެރި ޖިނާހް (ޖިނާއްޕެ) އަށް ވަރަށް ވެދުމާ ސަލާމް. މީސްމީޑިޔާ މެދުވެރިކޮށް ފާޅުކުރެއްވި ކަންބޮޑުވުމަކީ ރައީސުލްޖުމުހޫރިއްޔާވެސް މިވަގުތު އެންމެ ބޮޑު އަހައްމިއްޔަތުކަމެއް ދެއްވައިގެން ވަރަށް އަވަސް ހައްލެއް ހޯއްދަވަން މަސައްކަތްޕުޅުކުރައްވަމުން ގެންދަވާ… https://t.co/YNooPonJwL
— Ahmed Shiyam (@Shiyamaldives) November 30, 2023
މަސްވެރިޔާގެ އެ ސިޓީއާ ގުޅިގެން ޝިޔާމް ސީދާ އޭނަ އަށް ގުޅުއްވައި ވާހަކަ ދައްކަވައި މަސްވެރިޔާގެ ކަންބޮޑުވުންތައް އަޑުއެއްސެވި އެވެ. އަދި މިނިސްޓަރު ސޯޝަލް މީޑިއާގައި ޕޯސްޓެއްގައި ވިދާޅުވީ ސޯޝަލް މީޑިއާ މެދުވެރިކޮށް ފާޅުކުރި ކަންބޮޑުވުމަކީ ރައީސް ޑރ. މުހައްމަދު މުއިއްޒު ވެސް މިވަގުތު އެންމެ ބޮޑު އަހައްމިއްޔަތުކަމެއް ދެއްވައިގެން ވަރަށް އަވަސް ހައްލެއް ހޯއްދަވަން މަސައްކަތް ކުރައްވަމުން ގެންދަވާ ކަންބޮޑުވުންތަކެއް ކަމަށެވެ.
"ވަރަށް އުފާކޮށްފިން މީސްމީޑިޔާ މެދުވެރިކުރައްވާ އެތައް މަސްވެރިއެއްގެ ޙައްޤުގައި އަޑުއުފުއްލެވީތީ. އަޅުގަނޑުމެންނަކީ އިރާދަކުރެއްވިއްޔާ ދައްކާ ވާހަކަ ހަނދާން ނައްތާލާނެ ބައެއް ނޫންކަން ޔަޤީންކަން އަރުވަން،" ޝިޔާމު ވިދާޅުވި އެވެ. "މަސްވެރި ސިނާޢަތުގައި ހުރި ގޮންޖެހުންތަކަށް ދާއިމީ ހައްލެއް ރައީސް ޑރ.މުއިއްޒުގެ ސަރުކާރުގައި އަޅުގަނޑުމެން ލަސްތަކެއްނުވެ ހޯދާނަން إن شاءالله. ޖިނައްޕެއަށް ގުޅާލުމުން ހިއްސާކުރެއްވި ވާހަކަފުޅަކީ މުހިއްމު ވާހަކަފުޅެއް އަދި އެކަމަށް ނިމުމެއް ގެނެވޭނެ."
ޝިޔާމު ވިދާޅުވި ގޮތުގައި ގިނަކަ ންކަމަކީ ވާހަކަ ދައްކައިގެން ހައްލު ހޯދޭނެ ކަންކަމެވެ. އެހެންވެ އަމާޒަކީ މަސްވެރިންގެ އަޑު ގާތުން އަހައިގެން ޖުމްލަ ހައްލަށް މަސައްކަތްކުރުން ކަމަށް ވިދާޅުވި އެވެ.