ރާއްޖޭގައި މިހާރު އެއިޑްސް ބަލި ޖެހިފައި ތިބީ 22 މީހަކު ކަމަށް ހެލްތު މިނިސްޓްރީން ބުނެފި އެވެ.
މިއަދު ފާހަގަކުރަމުން އަންނަ ބައިނަލްއަގްވާމީ އެއިޑްސް ދުވަހާ ގުޅުވައިގެން މިނިސްޓްރީން އެ ބަލީގެ ރާއްޖޭގެ ހާލަތާ ގުޅޭ ގޮތުން އާންމުކުރި ތަފާސްހިސާބުތަކަށް ބަލާ އިރު ރާއްޖެ އިން މިހާތަނަށް އެއިޑްސް ޖެހުނީ 40 މީހަކަށެވެ. އޭގެ ތެރެއިން 15 މީހަކު މަރުވެފައިވާ އިރު، މިހާރު ފަރުވާގައި ތިބީ 22 މީހެކެވެ. މީގެ ތެރޭގައި ހިމެނެނީ 34 ފިރިހެނުންނާއި ހަ އަންހެނުންނެވެ.
ރާއްޖެ އިން އެންމެ ފުރަތަމަ އެއިޑްސް ބަލީގެ މީހަކު ފެނުނީ 1991 ގަ އެވެ.
މި ބައްޔަކީ އެއްކޮށް ފަސޭހަކުރެވޭ ބައްޔެއް ނޫނެވެ. އެއިޑްސް ޖައްސާ އެޗްއައިވީ ވައިރަސް އަރާ އެންމެ ފަސޭހަ ގޮތަކީ އެ ބަލި ޖެހިފައިވާ މީހަކާ އެކީ ޖިންސީ ގުޅުން ހިންގުމެވެ.