ހިމަބިހި ވެކްސިން ދިނުމުގެ ޤައުމީ ކެމްޕެއިނެއް ހދ. ކުޅުދުއްފުށީގައި މިއަދު ލޯންޗުކޮށްފި އެވެ.
މި ކެމްޕެއިން ލޯންޗްކޮށްދެއްވީ ހެލްތު މިނިސްޓްރީގެ ސްޓޭޓް މިނިސްޓަރު އަހުމަދު ގާސިމް އެވެ.
އެޗްޕީއޭ އިން ބުނީ މިއަދު ފެށުނު ކެމްޕޭނުގެ އަމާޒަކީ 18 އަހަރާއި 49 އަހަރާއި ދެމެދުގެ މީހުންގެ (ދިވެހިންނާއި ބިދޭސީން) ތެރެއިން ހިމަބިހި ވެކްސިންގެ 2 ޑޯޒް ފުރިހަމަ ނުވާ ފަރާތްތަކަށް ވެކްސިން ދިނުން ކަމަށެވެ.
އަދި ޞިއްޙީ ޚިދުމަތްތެރިން ގެ ތެރެއިން ހިމަބިހި ވެކްސިންގެ 2 ޑޯޒް ފުރިހަމަ ނުވާ ފަރާތްތަކަށް ވެސް މި ކެމްޕޭންގެ ތެރެއިން ވެކްސިން ދިނުމަށް ހަމަޖެހިފައިވާ ކަމަށާއި މި ކެމްޕޭނާއެކު ކުރިއަށް އޮތް ދެ ހަފްތާ ތެރޭގައި ރާއްޖޭގެ އެކި ހިސާބުތަކުގައި ވެކްސިން ޖެހުމުގެ މަސައްކަތް ފެށިގެންދާނެ ކަމަށްވެސް އެޗްޕީއޭ އިން ބުނެ އެވެ.
ހިމަބިހި ނައްތާލެވިފައިވާ ގައުމެއްގެ ގޮތުގައި ކަނޑައަޅާފައިވަނިކޮށް ރާއްޖެ އިން 2020 ވަނަ އަހަރުގެ ތެރޭގައި ވަނީ އަލުން ހިމަބިހީގެ ކޭސްތަކެއް ފެނިފަ އެވެ. އެއާއެކު ހިމަބިހި ވެކްސިން ކެމްޕޭނެއް ފެށިއިރު ކޮވިޑުގެ ބަލިމަޑުކަމާއެކު މި ކެމްޕެއިން ވަނީ މެދުކަނޑާލާފަ އެވެ. އަދި މިއަހަރުގެ ތެރޭގައި ވެސް ހިމަބިހީގެ ކޭސްތަކެއް ފެނިފައިވެ އެވެ.