ދިވެހި ރާއްޖޭގެ ދާޙިލީ ވަޒީރު މިނިސްޓަރ އަލީ އިހުސާންއަށް އުފަން، އަމިއްލަ ރަށުގެ ރައްޔިތުން ހޫނު މަރުހަބާއެއް ކިޔައިފިއެވެ.
ފޭދޫއަށް ނިސްބަތްވާ ހޯމްލޭންޑް، ސެކިއުރިޓީ އެންޑް ޓެކްނޮލޮޖީ އަލީ އިހުސާން ވަޒީރު ކަމާއި ހަވާލުވުމަށް ފަހު އަމިއްލަ އަތޮޅަށް ވަޑައިގަތީ މީގެ ދެތިން ދުވަހެއް ކުރިންނެވެ. އެ ދަތުރަކީ ވެރިކަން ކުރާ ޕީއެންސީގެ ލީޑާޝިޕްގެ ދަތުރެކެވެ. އެ ދަތުރުފުޅުގައި ރައީސް އޮފީހުގެ ދެ މިނިސްޓަރުންނާއި، އައްޑޫއަށް ނިސްބަތްވާ ބައެއް އިދާރާތަތަކުގެ އިސްވެރިން ބައިވެރިވެ ވަޑައިގެންނެވިއެވެ.
މި ދަތުރުފުޅު މިއަދު ނިންމަވާލެއްވުމުގެ ގޮތުުން ހަވީރު ސައިފޮދު ހަމައްޖައްސަވާފައި ވަނީ ގަމުގެ އީކުއޭޓަރ ވިލެޖުގެ ބްލޫ ލެގޫން ހޯލުގައެވެ. އެތަނަށް ވަޒީރު ވަޑައިގަތީ އެކި ދިމާލުން ރައްޔިތުންނާއި އަދި އެހެންވެސް މުޢައްސާސާތަކާއި ބައްދަލުވުން ތަކަށް ފަހުގައެވެ. އެތަނަށް ވަޑައިގަތުމުން ލިބިވަޑައިގަތީ ސަޕްރައިޒެއް ކަމަަށް އިހުސާނު ވިދާޅުވިއެވެ.
" މިއަދު ހަވީރަކީ މިހާތަނަށް އަޅުގަނޑު ހަޔާތުގައި ކުއްލިޔަކަށް ބަޔަކު ދިން އެންމެ ބޮޑު ސަޕްރައިޒް. މިތަނަށް އައިރުގަވެސް މައުލޫމާތު ލިބުނީ ސައެއް އޮތް ވާހަކަ، ދެން މިތާ ބޭރުގައި 10 ވަރަކަށް ބޭފުޅުން ސަލާން ކުރައްވަން ތިއްބެވީމަ އަޅުގަނޑު ހިތުން އެ ބޭފުޅުންނާއެކު ސައި ބޮއެލައިވެން ދިޔައީމަ ބަރާބަރޭ. ދޮރު ހުޅުވާލީމަ އެނގުނީ ތި އެންމެ ބޭފުޅުން ތިބިކަން، އެއީ އަޅުގަނޑަށް ލިބުނު ޝަރަފެއް، އުފަލެއް އަދި އެހާމަ ބޮޑު ސަޕްރައިޒެއް " އިހުސާން ވިދާޅުވިއެވެ.
މި ބައްދަލުވުމުގައި ފޭދޫގެ އެކި އުމުރުފުރައިގެ ގިނަ، ސަރުކާރަށް ތާއިދު ކުރާ ގިނަ ފަރާތްތަކުން ބައިވެރިވެވަޑައިގެންނެވިއެވެ. މި ބައްދަލުވުމުގައި ފޭދޫ ރައްޔިތުންގެ ފަރާތުން އިހުސާން އަށް ވަނީ ހަނދަނީ ފިލައެއް އަރުވާފައެވެ. މި ފިލާ އަރުވައި ދެއްވީ އައްޑޫސިޓީ ކައުންސިލުގައި ފޭދޫ ތަމްސީލު ކުރައްވާ ދެ ކައުންސިލަރުން ކަމަށްވާ ފައިސަލް އާއި ސަލްމާއެވެ.
އިހުސާން ވަނީ ބައްދަލުވުމަށް ފަހު ރައްޔިތުންނާއި އެކު ވަގުތުކޮޅެއް ހޭދަ ކުރައްވާފައެވެ.