ރާއްޖޭގެ މިހާރުގެ ރައީސް ޑރ. މުހައްމަދު މުއިއްޒާ އެކީ ބައިނަލްއަގުވާމީ މަސްރަހުގައި ރާއްޖެ ދާނީ އުސްމިނަކަށް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމު އަލީ ސައީދު ވިދާޅުވެއްޖެ އެވެ.
މިހާރު ޔޫއޭއީގައި ކުރިއަށްދާ ކޮޕް 28 ސަމިޓްގައި ރައީސް ބައިވެރިވެވަޑައިގަންވަމުންދާ އިރު، ޝަހީމް ސޯޝަލް މީޑިއާ ޕޯސްޓެއްގައި ވިދާޅުވީ މުއިއްޒަކީ ދުނިޔޭގެ ވެރިންގެ ސަފުގައި ވެސް ފެންނަ އެންމެ ތައުލީމީ ޒުވާން އެއް ބޭފުޅާ ކަމަށެވެ.
"ކުޑަ ދުވަސްކޮޅެއްގެ ތެރޭގައި ބައިނަލްއަޤުވާމީ މަސްރަހުގައި ރާއްޖެ އާ އުސްމިނަކަށް." އޭނަ ވިދާޅުވި އެވެ.
ޑރ. މުއިއްޒަކީ @MMuizzu ދުނިޔޭގެ ވެރިންގެ ސަފުގައި ވެސް ފެންނަ އެންމެ ތައުލީމީ ޒުވާން އެއް ބޭފުޅާ. ކުޑަ ދުވަސްކޮޅެއްގެ ތެރޭގައި ބައިނަލްއަޤުވާމީ މަސްރަހުގައި ރާއްޖެ އާ އުސްމިނަކަށް pic.twitter.com/Z0pJ1ujubl
— Mohamed Shaheem Ali Saeed (@Mohamedshaheem1) December 1, 2023
މުއިއްޒު ރާއްޖޭގެ ރައީސްކަމާ ހަވާލުވެވަޑައިގަތީ މިދިޔަ މަހުގެ 17 ގަ އެވެ. ޔޫއީގައި ކުރިއަށްދާ ކޮޕް ސަމިޓްގައި ރައީސް ބައިވެރިވެވަޑައިގެންފައި މި ވަނީ ވެރިކަމާ ހަވާލުވެވައިގަތުމަށް ފަހު، މިދިޔަ ހަފުތާގައި ރާއްޖެ އިން ބޭރަށް ކުރެއްވި ފުރަތަމަ ދަތުރުގައި ތުރުކީ އަށް ވަޑައިގަތުމަށް ފަހު އެވެ.
ކޮޕް ސަމިޓްގެ ތެރޭގައި ދުނިޔޭގެ އެކިއެކި ލީޑަރުންނާ ރައީސް މުއިއްޒު ބައްދަލުކުރައްވާފައިވެ އެވެ. އޭގެ ތެރޭގައި އިންޑިއާގެ ބޮޑުވަޒީރު ނަރެންދުރަ މޯދީ އާއި އިނގިރޭސި ރަސްގެފާނު ޗާލްސް އާއި ސްރީ ލަންކާގެ ރައީސް ރަނިލް ވިކްރަމަސިންހަ އާއި ޔޫއޭއީގެ ރައީސް ޝެއިހު މުހައްމަދު ބިން ޒައިދު އަލް ނަހުޔާސް އަދި އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރެސް ހިމެނިވަޑައިގަނެ އެވެ.