ސިވިލް ސާވިސް ކޮމިޝަން (ސީއެސްސީ) ގެ ކުރީގެ މުހައްމަދު ފަހުމީ ހަސަން ޕީއެޗްޑީ ހާސިލުކުރައްވައިފި އެވެ.
އޭނަ ޕީއެޗްޑީ ހާސިލުކުރެއްވީ މެލޭޝިއާގެ ޔުނިވަސިޓީ ތުން ހުސެން އޮންއިންނެވެ. ފަހުމީ ވަނީ ގްރެޖްއޭޝަން ހަފުލާގެ ފޮޓޯތަކެއް ވެސް ސޯޝަލް މީޑިއާގައި ހިއްސާކުރައްވައި ހެޔޮދުއާކޮށް ދެއްވި ހުރިހާ ފަރާތްތަކަށް ޝުކުރު ވެސް އަދާކުރައްވައިފަ އެވެ. އެކަމަކު ޕީއެޗްޑީ ހާސިލުކުރެއްވި ދާއިރާއެއް ހާމައެއް ނުކުރައްވަ އެވެ.
ފުވައްމުލަކަށް އުފަން ފަހުމީ މިދިޔަ މަހުގެ 20 ގައި ރައީސް ޑރ. މުހައްމަދު މުއިއްޒުގެ ސަރުކާރުގެ ފޮރިން މިނިސްޓްރީގެ ސްޓޭޓް މިނިސްޓަރުކަން ދެއްވި އެވެ. ނަމަވެސް އެ މަގާމު ދެއްވިތާ ތިން ވަރަކަށް ދުވަސް ފަހުން އޭނަ މަގާމުން ވަކިކޮށްފައިވެ އެވެ. ނަމަވެސް އެކަމާ ބެހޭ ތަފުސީލެއް ސަރުކާރުން ނުދެ އެވެ.
ފަހުމީ އަކީ އޭނަ ސީއެސްސީގެ ރައީސްގެ މަގާމުގައި ހުންނަވިކޮށް އަންހެން މުވައްޒަފަކަށް ޖިންސީ ގޯނާކުރި ކަމަށް ތުހުމަތުކޮށް، އެ ކޮމިޝަންގެ ރައީސްކަމާއި މެމްބަރުކަމުން ވަކިކުރި ބޭފުޅެކެވެ. ނަމަވެސް ސުޕްރީމް ކޯޓުން 2013 ގައި ނިންމީ އޭނާ ވަކިކުރަން ރައްޔިތުންގެ މަޖިލީހުން ނިންމި ހުރިހާ އިޖްރައާތެއް ބާތިލު ކަމަށެވެ. އެހެންވެ ގެއްލުމުގެ ބަދަލު ހޯދަން ފަހުމީ ކޯޓަށް ވެސް ވަޑައިގެންނެވި އެވެ.