ފޭދޫއަށް ލިބެންޖެހޭ ހައްޤު މިންވަރު ގަދަކަމުންވެސް ހޯއްދަވާނެ ކަމަށް މިނިސްޓަރ އޮފް ހޯމްލޭންންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާން ވިދާޅުވެއްޖެއެވެ.
އިހުސާން މިހެން ވިދާޅުވެފައިވަނީ ހުކުރު ދުވަހު ހަވީރު އައްޑޫސިޓީ ގަމުގައި، ފޭދޫ ރައްޔިތުން އިންތިޒާމުކޮށްގެން ބޭއްވި ބައްދަލުވުމެއްގައެވެ. މި ބައްދަލުވުމަކީ ދާޙިލީ ވަޒީރަކަށް އޭނާ އައްޔަން ކުރުމާއި ގުޅިގެން އެ ރަށު ރައްޔިތުން އޭނާއަށް މަރުހަބާ ދެންނެވުމަށް ބޭއްވި ބައްދަލުވުމެކެވެ. މި ބައްދަލުވުމުގައި ވާހަކަ ދައްކަވަމުން އިހުސާން ވަނީ އޭނާއާއި ހަވާލު ކުރެވިފައިވާ ވުޒާރާގެ އަކީ ހއ. ތުރާކުނުން ފެށިންގެ އައްޑޫ އަތޮޅު ގަމާއި ހަމައަށް ބޮޑު ޒިންމާއެއް ހަވާލުވެފައިވާ ވުޒާރާއެއް ކަމަށެވެ.
މިފަދަ ވުޒާރައެއްގެ ވެރިއަކަށް ފޭދޫއަށް ނިސްބަތްވާ އަދި އައްޑޫއަށް ނިސްބަތްވާ ފަރާތެއް ހަމަޖެއްސުމަކީ ރައީސް އައްޑޫއަށް ދެއްވާ އިސްކަން ހާމަވެގެންދާ ކަމެއް ކަމުގައި އޭނާ ވިދާޅުވިއެވެ.
" މިމިނިސްޓްރީގެ ހުންގާނުގައި އަޅުގަނޑު ހިފަހައްޓައިގެން ހުއްޓަސް، އަޅުގަނޑު ދެކޭ ގޮތުގައި މި ފުރުސަތަކީ ފޭދޫގެ؛ ޙާއްސަކޮށް އައްޑޫ އަތޮޅުގެ ކުރިއެރުމާއި ތަރައްޤީއަށްވެސް މަސައްކަތް ކުރަން އަޅުގަނޑަށް މަސައްކަތް ކުރަން ލިބޭ ވަރަށް ބޮޑު ފުރުސަތެއް. " އިހުސާނު ވިދާޅުވިއެވެ.
އަދި ވުޒާރާ ހިންގުމުގެ އިތުރުން ފޭދޫ އެކި ދާއިރާއިން ބޭނުންވެފައިވާ ޚިދުމަތްތަކާއި، ފޭދޫގެ ތަރައްޤީއަށްޓަކައި ވެވޭ ޕްރޮޖެކްޓުތަކާއި، އަދި ފޭދޫގެ ކުރިއެރުމަށް ސަރުކާރުގެ ތެރެއިން ހޯދަން ޖެހޭ އެއްބާރުލުން ހޯދުމުގައި ހާއްސަ އިސްކަމެއް އޭނާ ދެއްވާނެ ކަމަށް ވިދާޅުވިއެވެ.
" ތިޔަ އެންމެ ބޭފުޅުންގެ ނަންފުޅުގައި ސަރުކާރު ތެރޭގައި އަދި ހާއްސަކޮށް ކެބިނެޓުގައި ވަކާލާތުކޮށް އަޅުގަނޑުމެންނަށް ލިބެންޖެހޭ ހައްޤު މިންވަރު މި ފަސް އަހަރު ތެރޭގައި 'ގަދަކަމުންވެސް' އަޅުގަނޑު ހޯދާނަން " އިހުސާން ވިދާޅުވިއެވެ.
އިހުސާން ވިދާޅުވީ މި ސަރުކާރަށް ލިބެންޖެހޭ އެއްބާރުލުމާއި ތާޢިދު ފުރިހަމަ "ބާރު ސްޕީޑުގައި" ދޭނެ ކަމަށާއި، އަދި އައްޑޫއަށް ލިބިދޭން ޖެހޭ ތަރައްޤީ އެ ސްޕީޑުގައި ޑެލިވަރ ކޮށްދޭން އެދޭނެ ކަމަށެވެ. އަދި އެ މެސެޖު ރައީސް އަށް އަރުއްވާނެ ކަމަށް ވިދާޅުވިއެވެ.
އިހުސާން ވަނީ މި ދަތުރުގެ ތެރެއިން ވުޒާރާގެ ދަށުން ހިންގާ އިދާރާތަކަށް ވަޑައިގެން އެ ފަރާތްތަކުގެ ކަންބޮޑުވުންތައް އަޑުއައްސަވާފައެވެ. އަދި އޭގެ ތެރެއިން ބައެއް ކަންކަން ކުރިއަށް އޮތް ދެ ހަފްތާ ތެރޭ ހައްލު ކުރައްވާނެ ކަމަށް ވިދާޅުއެވެ.
އޭނާ މިހެން ވިދާޅުވި ބައްދަލުވުމުގައި ރައީސް އޮފީހުގެ ދެ މިނިސްޓަރުން ކަމަށްވާ އަބްދުﷲ ނާސިރު އަދި އާދަމް ރަމީޒު އަދި ސަރުކާރުގެ ބައެއް އިދާރާތަކުގެ ވެރިން ބައިވެރިވެޑައިގެންނެވިއެވެ. އިހުސާން އަދި ޕީއެންސީ ޓީމު އައްޑޫއަށް ކުރި ދަތުރު ނިންމާލާ ރޭގެ ވަގުތެއްގައި ވަނީ ފުރާފައެވެ.