އައްޑޫ ހިތަދޫގައި އިއްޔެ ރޭ ހިންގި މާރާމާރީއަކާ ގުޅިގެން ހަތަރު މީހަކު ހައްޔަރުކޮށްފި އެވެ.
މާރާމާރީތައް އިތުރުވަމުންދާތީ ފުލުހުން ވަނީ ހާއްސަ އޮޕަރޭޝަނެއް ވެސް ހިންގަން ފަށައިފަ އެވެ. އަދި މާލެ އިން ފުލުހުންގެ ޓީމެއް އައްޑު އަށް އަންނަ ގޮތަށް ވެސް ހަމަޖެހިފައިވެ އެވެ.
ފުލުހުން މިއަދު ބުނީ މާރާމާރީއާ ގުޅިގެން ކޯޓު އަމުރެއްގެ ދަށުން ހައްޔަރުކޮށްފައި ވަނި 18، 19، 20 އަދި 23 އަހަރުގެ ދިވެހި ޒުވާނުންތަކެއް ކަމަށެވެ. ނަމަވެސް އިތުރު ތަފުސީލެއް ނުދެ އެވެ.
ހުކުރު ދުވަހުގެ ރޭ ހިންގި މާރާމާރީގައި 30 އަހަރުގެ ފިރިހެނަކު "ކޮށާލާފައިވާ" އެވެ. އަދި އޭނަ އަށް އައްޑޫ އިކްއެޓޯރިއަލް ހޮސްޕިޓަލް (އޭއީއެޗް) ގައި ފަރުވާ ދެމުން އަންނަ އިރު، ހާލު ސީރިއަސް އެވެ. އެތަނުން ބުނީ އެ މީހާ އިތުރު ފަރުވާ އަށް މާލެ ފޮނުވޭތޯ މަސައްކަތް ވެސް ކުރަމުން އަންނަ ކަމަށެވެ.
އައްޑޫގައި މާރާމާތީތައް އިތުރުވަމުންދާތީ މިދިޔަ ހަފުތާގެ ތެރޭގައި އައްޑޫ ކައުންސިލާއި ހިތަދޫ ޕޮލިސް ސްޓޭޝަނާ ދެމެދު އެކަމާ ގުޅޭ ގޮތުން މަޝްވަރާކޮށްފައިވެ އެވެ.
އައްޑޫގައި މި އަހަރާއި މިދިޔަ އަހަރު ހިންގި މާރާމާރީތަކެއްގައި ދެ މީހަކު ވަނީ މަރާލައިފަ އެވެ. އެގޮތުން މި އަހަރުގެ ޖޫން މަހުގެ 1 ވަނަ ދުވަހުގެ ރޭ މަރަދޫފޭދޫގައި ދެބެއިންގެ މެދުގައި ހިންގި މާރާމާރީއެއްގައި ކޮއްކޮއަކު ވަނީ ތޫނު އެއްޗަކުން ހަމަލާދީ އޭނަގެ 27 އަހަރުގެ ބޭބެ މަރާލައިފަ އެވެ. އަދި މިދިޔަ އަހަރުގެ ޖޫން މަހު ފޭދޫގައި ގްރޫޕަކުން ޒުވާނަކަށް ދިން ހަމަލާއެއްގައި 21 އަހަރުގެ ޒުވާނަކު މަރާލާފައިވެ އެވެ.