ރާއްޖެއިން އެކްސްޕޯޓް ކުރާ މަހުގެ ބާވަތްތަކަށް ތުރުކީން ނަގާ ޓެރިފް ރޭޓް ކުޑަ ކުރުމާ ގުޅޭ މަސައްކަތްތަކެއް ފެށިފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނުގެ މަޤާމުގެ ހުވާ ކުރެއްވުމަށް ފަހު ރާއްޖެއިން ބޭރަށް ކުރެއްވި ފުރަތަމަ ރަސްމީ ދަތުރުފުޅަށް ފަހު އެނބުރި ޤައުމަށް ވަޑައިގެން ނޫސްވެރިންނާއި ބައްދަލު ކުރައްވާ ވިދާޅުވީ، ދެ ޤައުމު ދެމެދު ގިނަ ކަންކަމާއި މެދު މަޝްވަރާ ކުރެވިފައިވާ ކަމަށެވެ. އެގޮތުން ދެ ޤައުމުގެ ދެމެދުގެ ވިޔަފާރި ކުރިއެރުވުމާއި ބެހޭ އެއްބަސްވުމެއްގައި ސޮއި ކުރެވުނު ކަން އެމަނިކުފާނު ފާހަގަ ކުރެއްވިއެވެ.
މިކަމުގެ އިތުރު ތަފްސީލު ދެއްވަމުން އެ މަނިކުފާނު ވަނީ ރާއްޖޭގެ މަހުގެ ބާވަތްތައް ތުރުކީއަށް އެކްސްޕޯޓު ކުރުމާއި ގުޅޭ މަޝްވަރާތަކެއް ކުރެވިގެން ގޮސްފައިވާ ކަަން ހާމަކޮށްފައެވެ.
" މިހާރު ވަރަށް ބޮޑު ޓެރިފެއް މިއޮންނަނީ. ވަރަށް ޕޮޒިޓިވްކޮށް އެކަން އޮތީ ބަލައިގެންފައި. ރާއްޖެއަށް ހާއްސަ (އިސްތިސްނާއެއް) އޭގައި ދެވޭނެ ގޮތެއް. ރާއްޖެއަށް އޭގެ ޓެރިފް ކުޑަކުރެވޭނެ ގޮތެއް ބަލާ، އެކަމަަށް އެއްބަސްވެވޭނެ ގޮތްތަކެއް ހަމަޖެއްސުމުގެ މަސައްކަތް މިހާރު ވަނީ ފެށިފައި " ރައީސް ވިދާޅުވިއެވެ.
ރައީސް ވިދާޅުވީ މިކަން ރާއްޖޭގެ މަސްވެރިކަމުގެ އިންޑަސްޓްރީއަށް ލިބިގެންދާ ވަރަށް ބޮޑު ކުރިއެރުމަކަށް ވެގެން ދާނެ ކަމަށެވެ. އަދި މީގެ އިތުރަށް ކޮންސްޓްރަކްޝަން ދާއިރާ ހިމެނޭގޮތަށް ވަރަށް ބޮޑަށް ހުޅުވާލާ ގޮތަށް އޮތް ކަމަށް އެމަނިކުފާނު ވިދާޅުވިއެވެ.
ތުރުކީއަށް ބޭރު ކުރާ މަހުން ޓެރިފް ކުޑަ ކުރެވޭނެ ގޮތަކާއި މެދު ދެޤައުމުގެ މަޝްވަރާތައް ފެށިގެން ދިޔައިރު، އިންގިރޭސިވިލާތަށް ބޭރު ކުރާ މަހުން ޓެރިފް ކުޑަ ކުރުމަށް މިހާރުވެސް މަޝްވަރާ ކުރެވެމުންދެއެވެ. ދާދި ފަހުން ފިޝަރީޒް މިނިސްޓަރ އަހުމަދު ޝިޔާމް ވަނީ އެކަން ކުރުމަށް އަދި އަހަރަކަށް ވުރެ ގިނަ ދުވަސް ނަގާފާނެ ކަމަށް އަންދާޒާ ކުރެވޭ ކަމަށް ވިދާޅުވެފައެވެ.
ރާއްޖެއިން މިވަގުތު އެންމެ ބޮޑަށް މަސް އެކްސްޕޯޓު ކުރަނީ ތައިލޭންޑް މާކެޓަށެވެ. ނަމަވެސް ޔޫރަޕް މާކެޓަށް ބޭރު ކުރެވިއްޖެ ނަމަ މަހަށް ހަމަ އަގު ލިބި، އިންޑަސްޓްރީ ކުރިއަރާނެ ކަމަށް ސަރުކާރުތަކުން ޤަބޫލު ކުރެއެވެ.