އަންނަ މަހު މާލޭގެ މޭޔަރު ހޮވަން ބާއްވާ ބައި-އިލެކްޝަންގައި ވާދަކުރައްވާ ކެންޑިޑޭޓުންގެ މެދުގައި ބަހުސެއް ބާއްވަން ދައުލަތުގެ މީޑިއާ ޕީއެސްއެމުން ނިންމައިފި އެވެ.
އެތަނުން ބުނީ ބަހުސަށް ހުރިހާ ކެންޑިޑޭޓުންނަށް ދައުވަތު ދޭނެ ކަމަށާއި ވަރަށް އަވަހަށް ބަހުސް ބާއްވާނެ ތާރީހެއް ވެސް އިއުލާން ކުރާނެ ކަމަށެވެ.
ހުސްވެފައިވާ މާލޭގެ މޭޔަރު ކަމަށް ހަތަރު ކެންޑިޑޭޓަކު ވާދަކުރައްވަ އެވެ. އޭގެ ތެރޭގައި ހިމެނެނީ ޕީއެންސީ/ޕީޕީއެމްގެ ޓިކެޓްގައި ވާދަކުރައްވާ ކުރީގެ އެޓާނީ ޖެނެރަލް އާޒިމާއި ޝަކޫރާއި ކުރީގެ ރައީސް އަބްދުﷲ ޔާމީން އުފައްދަވަން މަސައްކަތްކުރައްވާ ޕީޕަލްސް ނެޝަނަލް (ފްރޮންޓް) ގެ ފަރާތުުން ވާދަކުރައްވާ ކުރީގެ ޕޮލިސް ކޮމިޝަނަރު ހުސައިން ވަހީދާއި އެމްޑީޕީގެ ފަރާތުން ވާދަކުރައްވާ އެމްޓީސީސީގެ ކުރީގެ ސީއީއޯ އާދަމް އާޒިމްގެ އިތުރުން ޑިމޮކްރެޓްސްގެ ފަރާތުން ވާދަކުރައްވާ މާލެ ސިޓީ ކައުންސިލްގެ މެންބަރެއް ކަމަށްވާ ސައިފު ފާތިހެވެ.
މާލޭގެ މޭޔަރު ހޮވަން ބާއްވާ ބައި-އިލެކްޝަން އޮންނާނީ އަންނަ މަހުގެ 13 ގަ އެވެ.
އެ މަގާމު ހުސްވީ ކުރިން އެ މަގާމުގައި ހުންނެވި ޑރ. މުހައްމަދު މުއިއްޒު ސެޕްޓެމްބަރު މަހު ބޭއްވި ރިޔާސީ އިންތިހާބު ކާމިޔާބުކުރެއްވުމާ ގުޅިގެންނެވެ.