ގައުމީ ޔުނިވާރސިޓީން ހުޅުމާލޭގައި މެޑިކަލް ކޮލެޖެއް ހަދަން ނިންމައިފި އެވެ.
މިކަމާ ގުޅޭ ގޮތުން ޔުނިވަސިޓީގެ ވައިސް ޗާންސެލަރު ޑރ. ޝެހެނާޒް އާދަމް ޕީއެސްއެމްގައި ވިދާޅުވީ އެމްއެންޔޫގެ މިހާރުގެ މެޑިކަލް ސްކޫލް ހިންގަމުން އަންނަނީ ވަރަށް ކުޑަކުޑަ ޖާގައެއްގައިކަމުން އެކަމުގެ ދަތިކަން ވަރަށް ބޮޑަށް އޮތް ކަމަށެވެ. އަދި މެޑިސިން ދާއިރާ އަކީ އަބަދުވެސް ކޮންމެ އަހަރަކު ވަރަށް ގިނަ ދަރިވަރުން ކުރިއަށްދާން ޝައުގުވެރިވާ ދާއިރާއެއްކަމުން ގިނަ ފުރުސަތުތަކެއް ފަހިކޮށް ދޭން ޖެހޭ ކަމަށް ވިދާޅުވި އެވެ.
އެހެންވެ ހުޅުމާލޭގައި މެޑިސިން ކޮލެޖެއް ހަދަން ނިންމީ ކަމަށް ޝެހެނާޒް ވިދާޅުވި އެވެ. އޭނަ ވިދާޅުވީ އެތަނުގެ ޑިޒައިން ވެސް މިހާރު އޮތީ ނިމިފައި ކަމަށެވެ. މެޑިކަލް ކޮލެޖް ޑިޒައިންކޮށްފައި ވާނީ ޓީޗިން ހޮސްޕިޓަލަކާއި އެ ނޫންވެސް އެ ދާއިރާ އިން ހުނަރު ހޯދުމަށް ބޭނުންވާނެ ވަސީލަތްތައް އެކުކެވޭ ކަމަށް ވެސް ޝެހެނާޒް ވިދާޅުވި އެވެ.
އޭނަ ވިދާޅުވި ގޮތުގައި މި މަސައްކަތް އަންނަ އަހަރު ތެރޭގަ ފަށާނެ އެވެ.
ގައުމީ ޔުނިވަސިޓީގައި މިހާރުވެސް މެޑިސިން ދާއިރާއިން 196 ދަރިވަރަކު އަންނަނީ ކިޔަވަމުންނެވެ.