ގައުމީ ޔުނިވަސިޓީގެ "ފަހި ދުވަސް" މި މަހުގެ 16 ގައި ބާއްވަން ނިންމައިފި އެވެ.
މިއީ އެ ޔުނިވަސިޓީގެ އެކި ފެކަލްޓީތަކުން ލިބެން ހުރި ފުރުސަތުތަކާ ބެހޭ ގޮތުން މައުލޫމާތު ދޭން ބާއްވާ ހަރަކާތެކެވެ. މި ފަހަރު "ފަހި ދުވަސް" ބާއްވަން ހަމަޖެހިފައި ވަނީ އާޓިފިޝަލް ބީޗްގައި މި މަހުގެ 16 ވަނަ ދުވަހުގެ ހަވީރު 4:00 އިން 6:00 އަށް ރޭގަނޑު 8:00 އިން 10:00 އަށެވެ.
ޔުނިވަސިޓީން ބުނީ އޭ ލެވެލް ނިންމާފައިވާ ދަރިވަރުންނާއި އަދި މަތީ ތަޢުލީމަށް ދާން ބޭނުންވާ މީހުންނަށް "ފަހި ދުވަސް" ގެ ކޯސްތަކަށް ކުރިމަތިލުމަށް ފޯމް ބަލައިގަތުމުގެ އިންތިޒާމު ހަމަޖައްސާފައި ހުންނާނެ ކަމަށެވެ. ކޯސްތަކަށް އެޕްލައިކުރުމުގެ އެންމެ ފަހު ސުންގަޑިއަކަށް ހަމަޖައްސާފައި ވަނީ އަންނަ މަހުގެ 25 ވަނަ ދުވަހެވެ.
"ފަހި ދުވަސް" ގައި މައުލޫމާތު ފޯރުކޮށްދޭ ދާއިރާތަކުގެ ތެރޭގައި، ބަހާއި އިންސާނީ ޢިލްމުތަކުގެ ދާއިރާ، ތަޢުލީމީ ދާއިރާ، އިންޖިނިއަރިން ދާއިރާ، ސިއްޙީ ދާއިރާ، ވިޔަފާރީގެ ދާއިރާ، ޓޫރިޒަމާއި މެހުމާންދާރީގެ ދާއިރާ، ދީނީ ޢިލްމްގެ ދާއިރާ، ސައިންސްގެ ދާއިރާ، ޝަރީއަތާއި ޤާނޫނުގެ ދާއިރާ، ނިޔެމި ކަމުގެ ދާއިރާ، އަދި ފައުންޑޭޝަން ކޯސްތަކުގެ ދާއިރާ ހިމެނެ އެވެ.