މާލޭގެ އަމީނީ މަގުގެ މިހާރު ނުނިމި އޮތް 2 ސެގްމެންޓްގެ މަސައްކަތް ނިންމުމަށް، މަސައްކަތް ފެށުމަށް ރޯޑް ޑިވެލޮޕްމެންޓް ކޯޕަރޭޝަނުން ނިންމާފައިވާ ކަމަށް އިންފްރާސްޓްރަކްޗަރ މިނިސްޓްރީން ހާމަކޮށްފިއެވެ.
އެ މިނިސްޓްރީން މިކަމާއި ގުޅިގެން ނެރުނު ނޫސް ބަޔާނުގައި ބުނީ، މަގުގެ މަސައްކަތާއި ގުޅިގެން އެ މިނިސްޓްރީ އަދި ރޯޑް ޑިވެލޮޕްމެންޓް ކޯޕަރޭޝަންއާއި އެކު ސްޓޭކް ހޯލްޑަރ މީޓިންއެއް ބޭއްވިފައިވާ ކަމަށެވެ. އަދި މިހާރު އެ މަގުން ނުނިމިވާ 2 ސެގްމެންޓް ނިންމުމުގެ މަސައްކަތް ކުރުމަށް، ނިންމާފައިވާ ކަމަށް މިނިސްޓްރީން ހާމަކުރައެވެ. އެއީ ސެގްމެންޓް 12 އަދި 13 ގެ މަސައްކަތެވެ.
މިގޮތުން މަސައްކަތް ފެށުމުގެ އެންމެ ފަހުގެ ކަންކަން މިހާރު ކޮންޓްރެކްޓަރ އާރްޑީސީން ކުރަމުންދާއިރު، އެ މަސައްކަތް ފެށުމުގެ ކުރިން މަގު ބޭނުން ކުރާ ފަރާތްތަކަށް ދިމާވެދާނެ ދަތިތައް ހައްލު ކުރުމާއި ގުޅޭގޮތުން މަޝްވަރާ ކޮށްފައިވާ ކަމަށް މިނިސްޓްރީން ބުނެއެވެ. މިގޮތުން ޓްރެފިކް ފްލޯ އަށާއި އާރްޓީއެލް ބަސް ރޫޓަށް ދިމާވާނެ ދަތިތައް ހައްލު ކުރަން ޓްރެފިކް ޕޮލިހުންގެ އެހީ ހޯދުމަށް ވަނީ ނިންމާފައެވެ.
މަގުގެ 2 ސެގްމެންޓުގެ މަސައްކަތް ނުނިމި އޮތް އިރު، މިމަގަކީ ކުރީ ސަރުކާރުން ދައުރު ތެރޭގައި ނިންމާނެ ކަމަށް ބުނި މަގެކެވެ. ނަމަވެސް މަސައްކަތުގެ ގޮތުުން ގިނަ ގޮންޖެހުންތަކެއް ކުރިމަތިވެ، އިންތިޤާލީ މަރުހަލާއަށް ސަރުކާރު ދިޔައިރުވެސް މަސައްކަތް ނުނިމެއެވެ. އޭގެ ފަހުން ބައެއް ނިންމުންތައް ނިންމަން ޖެހޭތީ މަސައްކަތް ވަނީ ހުއްޓިފައެވެ.