އަހަރު ނިމެން ގާތްވަމުން އަންނަ އިރު، އަހަރުގެ މިހާތަނަށް ރާއްޖެ އަށް ޒިޔާރަތްކުރި ޓޫރިސްޓުންގެ އަދަދު 1.7 މިލިއަނަށް އަރައިފި އެވެ.
މި އަހަރުގެ އަމާޒެއްގެ ގޮތުގައި ކަނޑައަޅާފައި އޮތީ އަހަރު ނިމުމުގެ ކުރިން މަދުވެގެން 1.8 މިލިއަން ޓޫރިސްޓުން ގެންނާށެވެ. ޓޫރިޒަމް މިނިސްޓްރީން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ދައްކާ ގޮތުން މި މަހުގެ 3 އާ ހަމައަށް ޖުމްލަ 1،703،204 ޓޫރިސްޓުން އައިސްފައިވެ އެވެ. މިއީ މިދިޔަ އަހަރުގެ މި މުއްދަތާ އަޅާބަލާ އިރު، 12.9 ޕަސެންޓްގެ އިތުރުވުމެކެވެ. މިދިޔަ އަހަރުގެ މި މުއްދަތުގައި ރާއްޖެ އައީ 1.5 މިލިއަން ޓޫރިސްޓުންނެވެ.
ރާއްޖެ އަށް މިހާރު ގިނައިން ޓޫރިސްޓުން ޒިޔާރަތްކުރާ ތިން ގައުމަކީ ރަޝިއާ، އިންޑިއާ އަދި ޗައިނާ އެވެ. އެގޮތުން ރަޝިއާ އިން މިހާތަނަށް 193،269 ޓޫރިސްޓުން އައިސްފައިވާ އިރު، އިންޑިއާ އިން އައި ޓޫރިސްޓުންގެ އަދަދު 185،987 އަށް އަރަ އެވެ. ޗައިނާ މިހާތަނަށް 176،803 ޓޫރިސްޓުން އައިސްފައިވެ އެވެ.
ރާއްޖެ އަށް މިދިޔަ އަހަރު 1.6 މިލިއަން ޓޫރިސްޓުން ޒިޔާރަތްކުރި އެވެ.