ރާއްޖޭގައި އެންމެ ފަހުން އުފެއްދި ސިޔާސީ ޕާޓީ، ދަ ޑިމޮކްރެޓްސްގެ މެންބަރުންގެ އަދަދު މި އަހަރު ނިމުމުގެ ކުރިން 10،000 އިތުރުކުރަން މަސައްކަތް ކުރަމުން އަންނަ ކަމަށް ބުނެފި އެވެ.
އެ ޕާޓީގެ ފުރަތަމަ ރައީސްގެ މަގާމަށް އިންތިހާބުވެވަޑައިގަޔް ހަސަން ލަތީފު ވިދާޅުވީ މިހާރު އެންމެ ބޮޑު އަމާޒަކަށްވެފައި އޮތީ މެންބަރުންގެ އަދަދު މި މަސް ނިމުމުފެ ކުރިން 10،000 އަށް އެރުވުން ކަމަށެވެ. ޖުލައި މަހު އެ ޕާޓީ ރަޖިސްޓްރީކުރި ފަހުން މެންބަރުން އިތުރު ކުރުމަށް ރާއްޖޭގެ އެކި ހިސާބުތަކުގައި އަންނަނީ ހަރަކާތްތައް ވެސް ހިންގަމުންނެވެ.
"މިއީ މިހާރުގެ އެންމެ ބޮޑު އަމާޒު، އެކަން މި އޮތް ކުރު މުއްދަތުގައި ކުރެއްވުމަށް މިހާރުވެސް މެންބަރުން ވަނީ އަމާޒު ހިފާފައި ވަރަށް ބޮޑު އުންމީދެއް އެބައޮތް ދިހަހާސް މެންބަރުން ހަމަވާނެ ކަމަށް،" ހަސަން ވިދާޅުވި އެވެ. "އަދި އެކަން ހާސިލްކޮށް ޕާޓީ އިތުރަށް ކުރިއަށްދިއުމަށް މަގުފަހިވެގެން ދާނެ."
ދައުލަތުގެ ބަޖެޓަކުން ސިޔާސީ ޕާޓީތަކަށް ފައިސާ ވެސް ލިބެނީ 10،000 މެންބަރުން ހަމަވާ ނަމަ އެވެ.
ހަސަން ވިދާޅުވި ގޮތުގައި ޕާޓީގެ މެންބަރުންގެ އަދަދު މި އަހަރު 10،000 އިތުރު ކުރުމަށް ދެން އޮތް އެންމެ ބޮޑު އަމާޒަކީ އަންނަ އަހަރު ނިމުމުގެ ކުރިން ރާއްޖޭގެ އެންމެ ބޮޑެތި ޕާޓީތަކުގެ ތެރޭގައި ގުނޭ ވަރަށް މެންބަރުން އިތުރުކޮށް، ޕާޓީ ވަރަށް ބޮޑަށް ވަރުގަދަ ކުރުމެވެ.
ޑިމޮކްރެޓްސް އިން މި އަހަރުގެ ރިޔާސީ އިންތިހާބުގައި ވެސް ވާދަކޮށް ތިން ވަނަ ހޯދާފައިވެ އެވެ. އެ ޕާޓީން މިހާރު އަންނަނީ އަންނަ މަހު ބާއްވާ މާލޭގެ މޭޔަރު ހޮވާ ބައި-އިލެކްޝަނަށް ވެސް ކެމްޕޭން ކުރަމުންނެވެ. އެ އިންތިހާބުގައޮ ވާދަކުރައްވާ ކެންޑިޑޭޓަކީ މާލެ ސިޓީ ކައުންސިލްގެ މެންބަރެއްގެ ގޮތުގައު ހުންނެވި ސައިފު ފާތިހެވެ.
މީގެ އިތުރުން އަންނަ އަހަރު ބާއްވާ މަޖިލިސް އިންތިހާބުގައި 93 ދާއިރާ އަށް ވާދަކުރަން ވެސް ޑިމޮކްރެޓްސް އިން ވަނީ ނިންމައިފަ އެވެ.
މި ޕާޓީ އަކީ ކުރީގެ ރައީސް މުހައްމަދު ނަޝީދު އިސްކޮށް ހުންނަވައިގެން އުފެއްދެވި ޕާޓީއެކެވެ.